मंदाणे येथे कोरोना रुग्ण आढळल्याने खळबळ

लोकमत न्यूज नेटवर्क
मंदाणे : शहादा तालुक्यातील मंदाणे व परिसरात कोरोना विषाणूचा प्रादुर्भाव होऊ नये म्हणून ग्रामपंचायत, आरोग्य, महसूल व पोलीस प्रशासनातर्फे लॉकडाऊन पाळून अन्य उपाययोजना करण्यात आल्या. त्यामुळे एकही कोरोना रुग्ण आढळून आला नव्हता म्हणून सर्व व्यवहार सुरळीत झाले असतानाच अहमदाबादहून आलेली महिला कोरोनाग्रस्त असल्याचे निष्पन्न होताच गावासह परिसरात प्रचंड खळबळ उडाली आहे. ग्रामस्थांमध्ये विशेषत: महिला वर्गात कमालीची भीती पसरली आहे.
रविवारी रात्री उशिरा आलेल्या अहवालानंतर प्रशासनही खडबडून जागे झाले असून रात्री उशिरा रुग्णाच्या संपर्कातील मंदाणे व असलोद येथील तब्बल ३२ जणांना क्वारंटाईन करून मोहिदा येथील कोवीड सेंटरमध्ये दाखल करण्यात आले आहे. त्यात २४ महिला व आठ पुरुषांचा समावेश आहे. तसेच या कोरोनाग्रस्त रुग्णाने उपचार घेतलेल्या असलोद व मंदाणे येथील खाजगी डॉक्टरांना परिवारासह १२ जणांना होम क्वारंटाईन करण्यात आले आहे.
मंदाणे गेल्या तीन महिन्यापासून काळजी घेऊनही अखेर अहमदाबाद रिटर्न महिलेमुळे गावात खळबळ उडाली आहे. प्रशासनाने या घटनेमुळे आता संपूर्ण मंदाणे गाव प्रतिबंधात्मक क्षेत्र म्हणून तर असलोद, भोरटेक, वडगाव, तितरी, वाघर्डे, भोंगरे, ओझर्टे, कलमाडी त.ह., दुधखेडा ही गावे बफर झोन म्हणून प्रांताधिकारी डॉ.चेतन गिरासे यांनी जाहीर केले असून मंदाणे गावात अत्यावश्यक सेवा वगळता अन्य सर्व वाहनांना ये-जा करण्यास प्रतिबंध करण्यात आले आहेत. यासाठी पोलीस, महसूल यंत्रणा तैनात करण्यात आली आहे.
मंदाणे येथील एक कुटुंब अहमदाबाद येथे नोकरीनिमित्ताने स्थायिक झाले होते. त्या परिवारातील ५२ वर्षीय महिला गरोदर असलेल्या सुनेला घेऊन मंदाणे गावी काही दिवसापूर्वीच परतली होती. येथे आल्यानंतर त्या महिलेची प्रकृती बिघडल्याने खाजगी रुग्णालयात उपचार घेतला. तेव्हा संबंधित डॉक्टरांनी त्यांची न्यूमोनियाची चाचणी करवून घेतली. मात्र कोरोनासदृश्य लक्षणे आढळून आल्याने याबाबतची माहिती मंदाणे प्राथमिक आरोग्य केंद्राला कळविण्यात आले. आरोग्य केंद्रामार्फत त्या महिलेला तातडीने १३ जून रोजी जिल्हा रुग्णालयात सकाळी दाखल करण्यात आले. त्या महिलेचे स्वॅब तपासणीसाठी पाठविण्यात आले. त्या दरम्यान ग्रामपंचायतीने ग्रामस्थांना सतर्क राहण्याचे आवाहन करुन शनिवारपासूनच लॉकडाऊन करण्याचा निर्णय घेतला व सर्वांचे लक्ष अहवालाकडे लागले. अखेर रविवार, १४ जून रोजी रात्री १० वाजेच्या सुमारास या महिलेचा स्वॅब अहवाल कोरोना पॉझिटीव्ह आल्याचे वृत्त गावात धडकले. या वृत्ताने गावात एकच खळबळ उडाली. ग्रामपंचायत, आरोग्य विभाग, पोलीस व महसूल यंत्रणेची झोपच उडाली. रात्रीच वरिष्ठ अधिकाऱ्यांनी पथकासह गावात येऊन ग्रामस्थांना सतर्क राहण्याचे आवाहन केले.
मंदाणे गावात कोरोना रुग्ण आढळून आल्याने नागरिकांमध्ये कमालीची भीती निर्माण झाली असून विशेषत: महिलांमध्ये घबराट पसरली आहे. कोरोना विषाणूचे संक्रमण होऊ नये म्हणून गावात ठिकठिकाणी बॅरिकेटस लावण्यात येऊन अत्यावश्यक सेवा वगळता सर्व व्यवसाय बंद करण्यात आले आहेत. रुग्णाचा रहिवास असलेला परिसर, मेनरोड, बाजारपेठसह परिसराचे निर्जंतुकीकरण करण्यात आले आहे.
प्रांताधिकारी डॉ.चेतन गिरासे, तहसीलदार डॉ.मिलिंद कुलकर्णी, पोलीस निरीक्षक किसन नजन पाटील हे गावावर लक्ष ठेवून आहेत. ग्रामस्थांनी घाबरुन न जाता दिलेल्या सूचनांचे पालन करण्याचे आवाहन सरपंच विजय सनेर, पं.स. सदस्या सुषमा साळुंके, उपसरपंच अनिल भामरे, ग्रामविकास अधिकारी शरद पाटील, पोलीस पाटील सुभाष भिल, तलाठी धनगर, वैद्यकीय अधिकारी डॉ.जितेंद्र पाटील यांनी आवाहन केले आहे.
दरम्यान, अहमदाबाद येथून आलेल्या या महिलेला होम क्वारंटाईन राहण्याच्या सूचना प्रशासनाने दिल्या होत्या का? हातावर शिक्का मारला होता का? आदी प्रश्न उपस्थित होत आहेत.
दरम्यान, लोणखेडा, ता.शहादा येथील मयत ६७ वर्षीय व्यक्तीचा कोरोना विषाणू बाधित असल्याचा अहवाल प्रशासनाला प्राप्त झाला असून त्याच्या संपर्कातील चार जणांना क्वारंटाईन करण्यात आले आहे. त्यांच्या घशातील स्वॅबचे नमुने घेण्यासाठी मंगळवारी आरोग्य प्रशासनातर्फे नंदुरबार जिल्हा रुग्णालयात पाठवण्यात येईल.

मंदाणे, ता.शहादा येथील कोरोनाबाधीत महिलेच्या संपर्कातील लोकांचा शोध घेऊन मंदाणे येथील २० महिला व तीन पुरुष, असलोद येथील चार महिला व पाच पुरुष अशा ३२ जणांना मामाचे मोहिदे येथील शासकीय वसतिगृहातील कोरोना सेंटरमध्ये दाखल करण्यात आले आहे. त्यातील जास्त संपर्कातील लोकांचे स्वॅब तपासणीसाठी पाठविण्यात येणार आहे. या महिलेने असलोद व मंदाणे येथे खाजगी डॉक्टरांकडे उपचार घेतल्याने तेथील डॉक्टरांनाही परिवारातील सदस्यांसह कंपाऊंडर व अन्य तीन जणांना होम क्वारंटाईन करण्यात आले आहे.