निवडणुकीसाठीच्या सर्वच वाहनांना जीपीएस यंत्रणा कार्यान्वीत

नंदुरबार : लोकसभा निवडणुकीत आदर्श आचारसंहितेच्या पालनाबाबत लक्ष ठेवण्यासाठी नियुक्त भरारी पथक. कर्मचारी व साहित्य घेवून जाणारी वाहने, सहाय्यक खर्च नियंत्रण निरक्षक आणि राज्य उत्पादक शुल्क विभागाच्या वाहनांवर जीपीएस यंत्रणा बसविण्यात आली आहे. त्याद्वारे नियंत्रण कक्षातून वाहनांच्या हालचालींवर लक्ष ठेवले जात आहे.
पथकांचे काम अधिक कार्यक्षमपणे व्हावे आणि त्यांच्या कामकाजात पारदर्शकता रहावी यासाठी एकूण ३४ वाहनांवर जीपीएस यंत्रणा यापूर्वीच बीएसएनएलच्या सहकार्याने बसविण्यात आली आहे. याशिवाय दुर्गम भाग आणि दुरवरच्या अंतरावर कर्मचारी आणि निवडणूक साहित्य वाहून नेणाऱ्या वाहनांनावर देखील जीपीएस यंत्रणा बसविण्यात आली आहे.
लोकसभा मतदार संघात प्रत्येक विधानसभा क्षेत्रातील चार भरारी पथकांच्या वाहनांवर, उत्पादन शुल्क विभागाच्या चार वाहनांवर आणि सहाय्यक खर्च निरीक्षक पथकाच्या सहा वाहनांवर ही यंत्रणा बसविण्यात आली आहे. भरारी पथकाद्वारे निवडणुकीत पैसे आणि वस्तुंची देवाण-घेवाणीसोबत आचारसंहितेच्या पालनाबाबत लक्ष दिले जात आहे.
अवैध दारूचा निवडणुकीत होणारा उपयोग रोखण्यासाठी उत्पादनशुल्क विभागाची पथके २४ तास कार्यरत आहेत. सहाय्यक खर्च निरीक्षकांच्या पथकाद्वारे विविध रॅली-सभा व इतर माध्यमातून निवडणुकीत होणाºया खर्चाबाबत माहिती संकलीत करण्यात आली आहे.
मुक्त आणि नि:ष्पक्ष वातावरणात निवडणुका होण्यासाठी निवडणूक यंत्रणा सज्ज झाली असून, जीपीएस यंत्रणेमुळे जिल्हा निवडणूक अधिकाऱ्यांना मतदार संघातील विविध भागावर लक्ष ठेवण्याबाबत योग्य नियोजन करणे शक्य होणार आहे.
जीपीएस प्रणालीमुळे वाहनाचे निश्चित ठिकाण कळण्यास मदत होत असल्याने पथकाचे कामकाज पारदर्शक होण्याबरोबरच आवश्यकतेनुसार पथकाला सूचना देणे शक्य झाले आहे. जिल्हाधिकारी बालाजी मंजुळे स्वत: जिल्ह्यात विविध ठिकाणी भरारी पथकांना भेट देवून पथकाच्या कामकाजाची पाहणीदेखील केली आहे.