मार्च एण्डमुळे ५० टक्के उपस्थितीला तिलांजली

नंदुरबार : मार्च एण्डमुळे सद्या विविध शासकीय कार्यालयांमध्ये कर्मचारी उपस्थिती कायम आहे. वास्तविक शासनाने कोरोनाच्या वाढत्या प्रादुर्भावामुळे शासकीय, निमशासकीय व खाजगी कार्यालयांमधील कर्मचारी उपस्थिती ५० टक्के ठेवण्यावर मर्यादा आणली आहे. परंतु त्यापेक्षा अधीक कर्मचारी उपस्थित राहत असल्याचे चित्र आहे.

कोरोनाचा वाढता प्रादुर्भावामुळे शासनाने विविध उपाययोजना लागू केल्या आहेत. त्याअंतर्गत शासकीय, निमशासकीय कार्यालयांमध्ये उपस्थितीवर मर्यादा ठेवण्याचे निर्देश देण्यात आले आहेत. परंतु सद्या मार्च एण्डचे कामे सुरू असल्यामुळे विविध विभागातील कर्मचारी उपस्थिती कायम राहत आहे. येत्या चार ते पाच दिवसात कामांची व्याप्ती मोठ्या प्रमाणावर राहणार असल्यामुळे कर्मचारी संख्या कायम ठेवावी लागणार आहे. दुसरीकडे मात्र अनेक कार्यालयातील कर्मचारी मोठ्या संख्येने कोरोना बाधीत झाल्याने अशा कार्यालयांमध्ये शुकशुकाट आहे.

जिल्हाधिकारी कार्यालय...

पुरवठा विभागात सात ते आठ कर्मचारी कोरोना पॅाझिटिव्ह आले आहेत. त्यामुळे या विभागात कामाचा ताण मोठ्या प्रमाणावर वाढला आहे. त्यामुळे ५० टक्के उपस्थितीवर मर्यादा आल्या आहेत. सद्या मार्च एण्डमुळे आहे त्या कर्मचाऱ्यांवर गाडा ओढावा लागत आहे.जिल्हा परिषद...

जिल्हा परिषदेतील विविध विभागातील काही कर्मचारी बाधीत आहेत. प्रत्येक विभागात कमी अधीक प्रमाणात ही स्थिती आहे. त्यामुळे सर्वच कर्मचाऱ्यांना कामावर बोलावावे लागत आहे. परिणामी ५० टक्के मर्यादा पाळणे दुरापस्थ होत आहे.

पंचायत समिती...

पंचायत समिती कार्यालयात देखील उपस्थिती मोठ्या प्रमाणावर दिसली. शिवाय कार्यालयाच्या आवारात देखील मोठी गर्दी कायम होती. कार्यालय हे शहराच्या मध्यवर्ती भागात असल्यामुळे या ठिकाणी मोठ्या संख्येने काम घेऊन येणाऱ्यांची दररोज गर्दी असते.