विठ्ठल मंदिरासाठी वृद्धाकडून सहा लाखांची देणगी

रतिलाल पाटील हे सध्या नंदुरबार येथे वास्तव्यास आहेत. उमेदीच्या काळात गावातील धार्मिक, सामाजिक कार्यक्रमात त्यांचा नेहमीच पुढाकार व सहभाग असायचा. कोळदे गावातील पुरातन विठ्ठल मंदिरावर त्यांची श्रद्धा असल्याने व ते जागृत मंदिर असल्याची भावना असल्याने विठ्ठल मंदिराच्या विधायक कामासाठी त्यांनी सहा लाख पाच हजार ५५१ रुपयांची रोख रक्कम पांडुरंगाच्या चरणी पूजा करून दान स्वरूपात दिली. विठ्ठल मंदिर ट्रस्टचे सचिव भरत सोमजी पाटील यांच्याकडे ही रक्कम सुपूर्द केली. रतिलाल बधू पाटील व त्यांचे भाऊ रामदास बधू पाटील यांचा भरत पाटील यांनी सत्कार केला.

या वेळी भरत पाटील म्हणाले की, हे मंदिर पुरातन काळातील जागृत मंदिर असून २०० ते २५० वर्षांचा इतिहास आहे. आपल्या पूर्वजांनी पहाडातून लाकडे आणून मातीच्या भिंतीचे हे मंदिर बांधले आहे. सन २००० मध्ये ग्रामस्थांनी एकत्र येऊन ट्रस्ट स्थापन केले आहे. आजच्या स्थितीत ट्रस्टकडे ४० एकर शेतजमीन असून मिळालेल्या देणगीतून शेतात दोन विहिरी खोदण्याचे निश्चित करण्यात आले आहे. या मंदिरास फक्त कोळदा गावाशी रक्ताचे नाते असलेल्या दात्यांकडूनच दान घेतले जाते. शेती उत्पन्न व आलेल्या देणगीतून मंदिराकडून विविध धार्मिक उत्सव व कार्यक्रम घेतले जातात. विठ्ठल मंदिराच्या विधायक कामासाठी रतीलाल बधू पाटील यांनी देणगी स्वरूपात मोठे सहकार्य केले असल्याने त्यांचे ट्रस्टतर्फे आभार मानले. या वेळी मंदिराचे ट्रस्टी, वसंत नथ्थू पाटील, अशोक शामजी पाटील, विठ्ठल कथ्थू पाटील, सुरेश बन्सी पाटील, रवींद्र मुरार पाटील व ग्रामस्थ उपस्थित होते.