वाढदिवसाच्या खर्चातून उपजिल्हा रुग्णालयाला दिले दाेन ऑक्सिजन बेड

सध्या कोविड-१९ चा प्रादुर्भाव मोठ्या प्रमाणात वाढला आहे. रुग्णालयात रुग्णांना उपचारासाठी बेडस उपलब्ध होत नसून ऑक्सिजनला देखील मोठ्या प्रमाणात तुटवडा निर्माण झाला आहे. अनेकांना रुग्णालयाचा बाहेर रुग्णांवर उपचार घ्यावे लागत असल्याचे चित्र आहे. कोविडच्या या भयावह परिस्थितीच्या पार्श्वभूमीवर स्वतः चा वाढदिवस साजरा न करता त्या खर्चातून उपजिल्हा रुग्णालयात कोरोना रुग्णांच्या सोयीसाठी दोन ऑक्सिजन बेड देण्याचा निर्णय तळोदा नगरपालिकेचे प्रभाग क्रमांक २ चे नगरसेवक हितेंद्र क्षत्रिय यांनी घेतला.

त्यानुसार मंगळवारी माजी आ. उदेसिंग पाडवी,तालुका वैद्यकीय अधिकारी डॉ महेंद्र चव्हाण, उपजिल्हा रुग्णालयाचे वैद्यकीय अधीक्षक डॉ. विजय पाटील, नगरसेविका अनिता परदेशी,माजी पोलीस उपनिरीक्षक केसरसिंग क्षत्रिय, सामाजिक कार्यकर्ते संदीप परदेशी,योगेश मराठे,नैवेद्य फाउंडेशनचे योगेश चव्हाण,दद्दू दुबे,हरीश जोशी,आशिष बारी,आदींच्या उपस्थितीत या ऑक्सिजन बेडचे लोकार्पण करण्यात आले.

याप्रसंगी मनोगत व्यक्त करताना माजी आमदार उदेसिंग पाडवी यांनी नगरसेवक हितेंद्र क्षत्रिय यांनी राबविलेल्या या उपक्रमाचे कौतुक केले व प्रत्येकाने कोरोनाच्या विरुद्धच्या युद्धात आपले योगदान देण्याचा प्रयत्न केला पाहिजे,असे आवाहन केले. नगरसेवक हितेंद्र क्षत्रिय यांनी उपलब्ध करून दिलेल्या बेडचे लोकार्पण झाल्यानंतर काही क्षणांतच त्यापैकी एका बेड हा एका कोरोनाग्रस्त रुग्णांच्या उपयोगी आल्याचे दिसून आले. यशस्वीतेसाठी भरत चौधरी,आदिल शेख,कमलेश पाडवी,लकी ग्रुपच्या कार्यकर्त्यांनी परिश्रम घेतले.

फोटो : ऑक्सिजन सिलिंडर व बेडचे लोकार्पण करताना माजी. आम. उदेसिंग पाडवी,तालुका वैद्यकीय अधिकारी डॉ. महेंद्र चव्हाण, उपजिल्हा रुग्णालयाचे वैद्यकीय अधीक्षक डॉ. विजय पाटील,नगरसेवक हितेंद्र, नगरसेविका अनिता परदेशी, सामाजिक कार्यकर्ते संदीप परदेशी,योगेश मराठे,आदी