जिल्ह्याला पीएम केअर फंडातून मिळालेले ५८ व्हेंटिलेटर्स रुग्णसेवेत तैनात

नंदुरबार : कोरोनाबाधितांची प्रकृती चिंताजनक झाल्यास त्यांना कृत्रिम श्वासोच्छवास प्रणाली अर्थात, व्हेंटिलेटर गरजेचे आहे. ही बाब लक्षात घेत, केंद्र सरकारने देशभरात व्हेंटिलेटर्स वाटप केले होते. जिल्ह्याच्या खात्याही तब्बल ५८ व्हेंटिलेटर्स आले होते. गेल्या काळात या यंत्रांचा उपयोग झाला असून, तूर्तास यातील १० मात्र उपयोगाअभावी बंद आहेत.

जिल्हा सामान्य रुग्णालयात कोरोनाचा संसर्ग वाढण्यापूर्वी १० व्हेंटिलेटर्स उपलब्ध होते. सोबत १० हायफ्लो मशीनही होते. यामुळे गंभीर कोरोनाबाधितांवर उपचार करणे शक्य होत होते, परंतु रुग्णसंख्या वाढल्यानंतर जिल्ह्यातून झालेल्या पाठपुराव्याने ४८ व्हेंटिलेटर हे सिव्हिलसाठी तर १० व्हेंटिलेटर हे धडगाव आणि नवापूर रुग्णालयात दिले गेले होते. देण्यात आलेले हे व्हेंटिलेटर्सचा वापर केवळ नंदुरबारात प्रारंभी झाला. नेत्रकक्षातील प्रत्येक बेडसाठी हे व्हेंटिलेटर्स लावले गेले. नवापूर गेल्या दोन महिन्यांपासून ऑक्सिजन उपलब्ध झाल्याने हे व्हेंटिलेटर्स वापरात येत असल्याची माहिती देण्यात आली आहे, परंतु धडगावात मात्र त्यांचा वापर झालेला नसल्याचे खात्रीशीरपणे सांगितले जात आहे. येत्या काळात त्यांचा उपयोग होणार असल्याने हे मशीन वाया जाणार नसल्याची माहिती दिली गेली आहे.

नंदुरबार जिल्हा रुग्णालयात वापरात येणाऱ्या व्हेंटिलेटर्सची स्थिती चांगली असून, वेळोवेळी सर्वच व्हेंटिलेटर कामी आल्याची माहिती देण्यात आली आहे. येत्या काळातही हे मशिन्स कामी येणार असल्याने, त्यांची देखभाल दुरुस्ती आरोग्य अधिकारी व कर्मचारी वेळोवेळी करून घेत आहेत. येत्या काळात जिल्ह्यासाठी ऑक्सिजन प्लांट वाढणार असल्याने, या मशिन्सचा वापर इतर ठिकाणी शक्य असल्याचे सांगण्यात आले आहे. त्यानुसार, सध्या नियोजन केले जात असल्याचे सांगण्यात आले.

नवापुरात तीनच सुरू

नवापूर उपजिल्हा रुग्णालयात तयार करण्यात आलेल्या कक्षात पाच व्हेंटिलेटर्स देण्यात आले होते. तीनच सुरू असल्याचे सांगण्यात आले. उर्वरित दोन मशिन्स पडून असल्याची माहिती आहे. नवापुरातील गंभीर रुग्णांना नंदुरबार येथे हलविले जात असल्याने, या व्हेंटिलेटर्सचा वापर हा कमीच असल्याची माहिती दिली गेली.

धडगावात मात्र बंद

धडगाव रुग्णालय आधीपासून समस्यांचे माहेरघर आहे. या ठिकाणी सध्या मशीन असले, तरी त्यासाठी लागणारा २४ तास वीजपुरवठा नसल्याने, कोणत्या रुग्णाला व्हेंटिलेटर्स लावणार, असा प्रश्न आहे. रुग्णालयात सध्या केवळ दैनंदिन तपासण्या करण्यावरच भर दिला जात आहे. कोरोनाबाधित थेट नंदुरबारकडे येत आहेत.

नंदुरबारात उपयोगी

नंदुरबार जिल्हा रुग्णालयात कोरोना संसर्ग झालेल्या सुमारे २० हजारांच्या जवळपास रुग्णांनी गेल्या दीड वर्षांत उपचार घेतले आहेत. बेड व ऑक्सिजन सुविधा असल्याने पीएम केअर फंडातून दिलेले व्हेंटिलेटर्स भविष्यातही कामीच येणार असल्याचे वैद्यकीय तज्ज्ञांकडून सांगितले गेले. यात वाढ होणेही अपेक्षित आहे.

पीएम केअर फंडातून

पीएम केअर फंडातून मिळालेल्या ४८ मशिन्सला तातडीने जिल्हा रुग्णालयात इन्स्टाॅल करण्यात आले होते. यातून रुग्णांना अनेक तास व्हेंटिलेटर सहज मिळाल्याने, त्यांचे प्राण वाचल्याचे सांगण्यात येत आहे. जिल्हा रुग्णालयातील आधीचे मशिन्सही चांगल्या स्थितीत असल्याने त्यांचाही वापर होत आहे. सध्या रुग्णसंख्या घटल्याने यातील काही मशिन्स बंद करण्यात आले आहेत. गंभीर रुग्ण आल्यावर त्यांना या व्हेंटिलेटरच्या माध्यमातून बरे करण्याचा प्रयत्न करण्यात येत असल्याची माहिती देण्यात आली आहे. दरम्यान, शहादा, तळोदा व अक्कलकुवा येथील शासकीय रुग्णालयांमध्ये ही वाढीव व्हेंटिलेटर दिले जाणार असल्याची माहिती आरोग्य विभागाने दिली आहे.