तळोदा तालुक्यात सहा हजार मतदारांना मतदान कार्ड वाटप

मतदान दिनानिमित्त तळोदा तालुक्यात बीएलओंमार्फत मतदान ओळखपत्रे प्रदान करण्यात आली. तालुक्यात जिल्हा परिषद शाळेतील शिक्षकांची बीएलओ म्हणून नियुक्ती करण्यात आली आहे. त्यांच्यामार्फत मतदारांच्या ओळखपत्रासाठी नोंदणी करून माहिती तयार करण्यात आली होती. तालुक्यात प्रामुख्याने नवमतदारांवर लक्ष केंद्रित करण्यात आले होते. यातून एक हजार ६७० नवमतदारांना मतदार दिनाचे औचित्य साधून मतदान ओळखपत्रे देण्यात आली. दरम्यान तालुका प्रशासनाने डिसेंबर २०२० मध्ये चार हजार ५०० ओळखपत्रे वाटप केली आहेत. यातून जानेवारी मध्यपर्यंत एकूण सहा हजार ३७० जणांना ओळखपत्रांचे वाटप करण्यात आले आहे. तळोदा महाविद्यालयात नवमतदारांना ओळखपत्र वाटपाचा कार्यक्रम पार पडला. यावेळी तहसीलदार गिरीश वाखाणे यांच्या हस्ते मतदान ओळखपत्रे देण्यात आली. प्रसंगी वाखारे यांनी सांगितले की, मतदानाबाबत जनजागृती ही आवश्यक आहे. मतदारांनी मतदानाचा हक्क बजावला पाहिजे. मतदानाचा अधिकार हा महत्त्वाचा आहे. नवमतदारांनी जागृत होवून मतदान केेले पाहिजे. दरम्यान, बोर व मोड केंद्र शाळेतील जिल्हा परिषदेच्या शाळांमध्येही मतदारांना मतदान ओळखपत्रांचे वाटप करण्यात आले.