शहरात कोंडवाडा तयार असूनही जनावरे मोकाट

शहरातील अनेक भागात अरुंद रस्ते असल्याने वारवांर वाहतुकीचा खोंळबा निर्माण होत असल्याने या भागात मोकाट गुरे व कुत्र्यांची समस्या निर्माण झाली आहे. त्यामुळे अनेकवेळा अपघात देखील झाले आहेत. पालिका प्रशासनाने मोकाट गुरांचा बंदोबस्त करावा, अशी मागणी गेल्या अनेक दिवसांपासून करण्यात येत आहे. शहरातील उघड्यावरील कचऱ्यामुळे मोकाट जनावरांना खाद्य मिळत असल्याने साफसफाई कामात कुचराई केल्याबद्दल पालिकेने सफाई ठेकेदारांना दंडही ठोठावला आहे. गेल्या महिन्यापासून सेवा फाउंडेशन या सफाई ठेकेदार संस्थेने मोकाट गुरे पकडण्याची मोहीम सुरू करण्याचा निर्णय घेतला होता. त्यासाठी पालिकेने त्यांना कृषी उत्पन्न बाजार समिती परिसरात कोंडवाडा उपलब्ध करून दिला आहे. या मोहिमेला सुरुवात होऊन महिना झाला, मात्र मोकाट गुरामुळे वाहतुकीचा खोळंबा निर्माण होत आहे.

कोंडवाड्यात सुरुवातीला गुरांची रवानगी केल्याने बऱ्यापैकी रस्त्याची मोकळीक झाली होती. पालिकातर्फे गुरे मालकांना गुरे बांधून ठेवावी, अन्यथा बेवारस गुरे जप्त करण्यात येतील व गुरांना सोडविण्यासाठी मालकास प्रतिदिन २०० रुपये दंड भरावा लागणार असल्याचे पालिकेने स्पष्ट केले असूनही शहरातील अहिल्याबाई विहीर चौक, क्रांती स्मारक चौक, गणपती मंदिर, हाटदरवाजा, अंधारे स्टॉप, मंगळबाजार या भागात मोकाट गुुुुरे ठाण मांडून बसल्याचे चित्र दिसून येत आहे. मोकाट गुरांमुळे रहदारीला १५ ते २० मिनिटे पर्यत अडथळा निर्माण होत असून मोकाट गुुुुरे रस्त्यावर फिरत असल्याने वाहने चालवताना किरकोळ अपघात घडण्याचे प्रमाण वाढले आहे. नगरपालिका प्रशासनाने मोकाट गुरे ताब्यात घेऊन मालकांना गुरे गोठंयात बाधंण्यासाठी सक्ती करावी, व कायदेशीर कारवाई करावी, असे मत वाहनधारकाकडून व्यक्त होत आहे.

शहरातील विविध चौकात मोकाट गुरांचा वाढला त्रास

शहरातील भाजीपाला मार्केट,बसस्थानक परिसर,नेहरू चौक,जुनी पालिका रोड, अहिल्याबाई विहीर चौक, क्रांती स्मारक चौक, गणपती मंदिर, हाटदरवाजा,अंधारे स्टॉप, मंगळबाजार या रस्त्यावर मोकाट गुरे ठाण मांडून बसलेली असतात. त्यामुळे वाहतुकीला वारंवार अडथळा निर्माण होत असल्याने वाहनांचा खोळंबा निर्माण होत आहे.

शहरातील मोकाट गुरांची समस्या गेल्या १५ वर्षांपासून सुरू असून पालिकाने आतापर्यंत या समस्येवर मार्ग काढला नसून मोकाट गुरांमुळे वाहनचालकांना अपघात होऊन अवयव निकामी होऊन त्रास सहन करावे लागत आहे. यावर कायम स्वरूपाचा मार्ग काढणे आवश्यक आहे.

-अमोल राजपूत वाहनधारक,नंदुरबार

मोकाट जनावरामुळे रस्त्याने पायी चालनेही मुश्कील झाले असून कधीही अंगावर मोकाट जनावरे व कुत्रे येथील याची मनात नियमित भीती असते, पालिका प्रशासनाने याबाबत ठोस भूमिका घेऊन मोकाट जनावराची योग्य ठिकाणी रवानगी करावी.

- विक्की सूर्यवंशी व्यावसायिक,नंदुरबार