वाल्हेरी आरोग्य केंद्रासाठी नव्या रुग्णवाहिकेचे लोकार्पण

या वेळी ॲड. सीमा वळवी यांनी मानव विकास कार्यक्रमामध्ये उपस्थित गरोदर, स्तनदा माता व लहान बालकांच्या आरोग्याविषयी मार्गदर्शन केले. गरोदर व स्तनदा मातांना अंगणवाडीमार्फत पुरविल्या जाणाऱ्या अमृत आहाराची विचारपूस करुन गरोदरपणातील आहार व काळजीबाबत बोलीभाषेत समजावून सांगितले. या वेळी बालरोगतज्ज्ञ डॉ. रणजित पावरा व डॉ. इंद्रसिंग वळवी उपस्थित होते. रुग्ण कल्याण समितीच्या बैठकीत विविध आरोग्यविषयक मुद्यांवर चर्चा व मार्गदर्शन करण्यात आले. नवीन रुग्णवाहिका लोकार्पण कार्यक्रमास पं.स. सदस्या सुमनबाई वळवी, धर्मेंद्र वळवी, वाल्हेरीचे सरपंच पुन्या वसावे, उपसरपंच विलास वसावे, ग्रामपंचायत सदस्य व ग्रामस्थ उपस्थित होते. प्राथमिक आरोग्य केंद्रातील सोयी-सुविधांबाबत व रुग्णसेवेबाबत जि.प. अध्यक्षा ॲड. सीमा वळवी यांनी समाधान व्यक्त केले.

याच कार्यक्रमात कोरोना काळात कार्यक्षेत्रात उत्कृष्ट काम करणाऱ्या वैद्यकीय अधिकारी, आरोग्य कर्मचारी व आशा कर्मचारी यांचा कोरोना योद्धा म्हणून सत्कार करण्यात आला व येत्या काळात अजून जास्त उमेदीने काम करण्याचे प्रोत्साहन दिले. तालुका वैद्यकीय अधिकारी डॉ.महेंद्र चव्हाण यांनी शासनाच्या विविध आरोग्य योजनांबाबत माहिती दिली. कार्यक्रमासाठी वैद्यकीय अधिकारी डॉ.सायसिंग पावरा, पवार, ठाकरे, आरोग्य सहायक राणे, आरोग्यसेवक जगदीश नाईक, धनगर व आरोग्य सेविकांनी सहकार्य केले.