कोरोनासोबत डेंग्यूलाही सामोरे जाणार

लोकमत न्यूज नेटवर्क
नंदुरबार : आधीच कोरोनाचा कहर, त्यात पावसाळ्यात डेंग्यूची साथ नको म्हणून हिवताप विभाग सरसावला आहे. यासाठी आतापासूनच घरोघरी सर्व्हेक्षण करून रक्तजल नमुने घेण्यास सुरुवात करण्यात आली आहे. गेल्या वर्षी डेंग्यूवर बऱ्यापैकी नियंत्रण मिळवता आले होते.
डेंग्यू आजाराला प्रतिबंध करण्यासाठी नागरिकांनी डासांची उत्पत्ती ठिकाणी परिसरात निर्माण होऊ देऊ नये, तसेच आवश्यक दक्षता बाळगून आरोग्य यंत्रणेला सहकार्य करावे, असे आवाहन जिल्हा हिवताप अधिकारी आर.बी.ढोले यांनी केले आहे.
किटकजन्य रोग नियंत्रण कार्यक्रमांतर्गत नंदुरबार जिल्ह्यात २०१९ मध्ये एकूण २००२ रक्त जल नमुने तपासणी करण्यात आली. त्यामध्ये १५३ डेंग्यू निश्चित रुग्ण तसेच खाजगी रुग्णालयातील २९८ असे ४५१ रुग्ण एन.एस.१ चे आढळून आले आहेत.
एप्रिल २०२० मध्ये एकूण सरकारी रुग्णालयातील १६३ रक्त जल नमुन्याची तपासणी करण्यात आली होती. त्यात ६ डेंग्यू निश्चित रुग्ण तसेच खाजगी रुग्णालयातील ६ असे १२ रुग्ण एन.एस.१ चे आढळून आले आहेत.
मागील दोन वर्षांत डेंग्यू रुग्णांमध्ये वाढ झालेली दिसून येते. डेंग्यू आजाराचा प्रसार हा एडिस या डासांच्या चावण्यापासून होत असल्याने तसेच या डासांची उत्पत्ती साठवणूक केलेल्या स्वच्छ पाण्यात होते. नागरीकांनी आपल्या घरातील पाणी साठवणूकीचे भांडे आठवड्यातून एकदा रिकामे व कोरडे करुन भरावे एक दिवस कोरडा पाळण्यात यावा.
आपल्या घराच्या आजुबाजूचा परिसर स्वच्छ राहील याची काळजी घ्यावी. घराजवळ असलेली नाले वाहते करुन डासोत्पत्ती स्थाने नष्ट करण्यात यावीत. नष्ट करता न येणाºया मोठ्या डासोत्पत्ती स्थानांमध्ये गप्पी मासे सोडण्यात यावीत.अंगभर कपडे घालावेत, झोपतांना मच्छरदाणीचा वापर करावा, डास पळवून लावणा?्या क्रीम व कॉईल चा वापर करावा जेणे करुन डासोत्पत्तीला व आजार प्रसाराला प्रतिबंध होईल व डेंग्यू आजाराला टाळता येईल. त्यामुळे प्रत्येकाने आरोग्य विभागाच्या सुचनांचे पालन करावे असे आवाहन देखील करण्यात आले आहे. खाजगी वैद्यकीय व्यावसायईकांनी आपल्या रुग्णालयांमध्ये डेंग्यू रॅपिड टेस्टद्वारे डेंग्यू दुषित आढळून आलेल्या रुग्णांचे रक्तजल नमुने डेंग्यू आजाराच्या निदानाकरीता सेन्टीनल सेन्टर येथे पाठविण्याची कार्यवाही करावी, असे आवाहनही ढोले यांनी केले आहे.

डेंग्यू हा आजार नोटिफायबल आजार असल्यामुळे जिल्ह्यातील खाजगी वैद्यकीय व्यवसायिक व खाजगी प्रयोगशाळांनी रुग्णालयामध्ये डेंग्यू दुषित रुग्ण आढळून आल्यास त्याची सूचना त्वरीत जिल्हा हिवताप अधिकारी कार्यालयास द्यावी. डेंग्यू या आजाराचे निश्चित निदानासाठी फक्त इलायझा टेस्ट असून त्याची टेस्ट जिल्हामध्ये शासकीय जिल्हा रुग्णालयातील सेन्टीनल सेन्टर येथे कार्यान्वित केलेली आहे.