कोरोना रोखायचा, पण निधी कोठून आणणार?

तळोदा : येथील नगरपालिकेस गेल्यावर्षी कोरोना महामारीच्या उपाययोजना करण्यासाठी सहा लाख रुपयांचा निधी मिळाला होता. परंतु, यंदा पालिकेस निधी मिळण्याची प्रतीक्षा लागून आहे. पालिका आपल्याकडीलच निधी खर्च करीत असली तरी प्रशासनाने तातडीने निधी उपलब्ध करून देण्याची मागणी होत आहे.

नंदुरबार, शहादानंतर तळोद्यात सर्वाधिक कोरोना रुग्ण आढळून येत आहेत. तळोदा पालिकेमार्फत संपूर्ण शहरात औषध फवारणी केली जात आहे. गेल्यावर्षी कोरोना उपाययोजनेसाठी जिल्हा प्रशासनाने तेथे पालिकेला सहा लाखांचा निधी टप्प्याटप्प्याने तीनवेळा निधी दिला होता. साहजिकच यातून पालिकेलादेखील थोडीफार आर्थिक मदत झाली होती. परंतु, यावर्षी प्रशासनाकडून अजूनही निधी प्राप्त झालेला नाही. याबाबत पालिका प्रशासनास विचारले असता, आतापर्यंत निधी आलेला नाही. मागणी केली आहे. लवकरच मिळणार असल्याचे सांगण्यात आले. वास्तविक गेल्यावर्षीपेक्षा या मार्च महिन्यातच रुग्णांची संख्या प्रचंड वाढत आहे. त्यामुळे साहजिकच गावात उपाययोजना करण्यासाठी निधीही लवकर मिळणे अपेक्षित आहे. मात्र, त्यावर अजूनही कार्यवाही होत नसल्याने नागरिकांनी नाराजी व्यक्त केली आहे.

सध्या पालिकेचा स्वतःचा दवाखाना नाही. तरी पालिकेला इतर आरोग्य सुविधांसाठी खर्च करावा लागत असतो.