जिल्हा रुग्णालयाच्या लॅबमध्ये दररोज एक हजार नागरीकांची कोरोना चाचणी

नंदुरबार : जिल्हा रुग्णालयाच्या आरटीपीसीआर लॅबमध्ये दरदिवशी होणा-या चाचण्यांची संख्या वाढली आहे. आजअखेरीस सरासरी एक हजार चाचण्या करण्यात येत असल्याने रुग्ण समोर येण्याचे प्रमाण वाढले आहे.

जिल्ह्यात एप्रिल २०२० मध्ये कोरोनाचा पहिला रुग्ण आढळून आला होता. तत्कालीन स्थितीत जिल्ह्यात आढळून येणा-या रुग्णांची स्वॅब टेस्ट प्रारंभी पुणे व त्यानंतर धुळे येथे करण्यात येत होती. दरम्यान जुलै महिन्यात ट्रूनेट मशिन जिल्हा रुग्णालयाला देण्यात आले होते. हे मशिन काही काळ चालवल्यानंतर स्वतंत्र अशी आरटीपीसीआर लॅब जिल्ह्यासाठी सुरु करण्यात आली. जिल्ह्यातील कोरोना चाचणी करण्याची ही एकमेव तरतूद असून याठिकाणी सरासरी १ हजार चाचण्या दररोज होत आहेत. या चाचण्या करण्यासाठी जिल्ह्यात स्वॅब संकलन केंद्र सुरु करण्यात आले असून निशुल्क अशा या सेवेच आतापर्यंत ९० हजार नागरीकांनी लाभ घेतल्याची माहिती देण्यात आली आहे.

१ हजार

जिल्ह्यात दररोज केल्या जाणा-या चाचण्या

जिल्हा रुग्णालयातील एकमेव लॅबमध्ये स्वॅब तपासण्या केल्या जात आहेत. काही ठिकाणी रॅपिड ॲंटीजेन टेस्ट होत असल्या तरी नागरीक आरटीपीसीआरला पसंती देतात.

८ हजार ७०३

चाचण्या जिल्ह्यात गेल्या आठवडाभरात झाल्या

दरदिवशी जिल्ह्यातील किमान १ हजार नागरीकांचे उद्दीष्ट्य डोळ्यासमोर ठेवल्याने आठवडाभरात वरील संख्येने चाचण्या झाल्या.

नंदुरबार जिल्ह्यात खाजगी लॅबमध्ये कोरोना चाचणी करण्याची परवानगी अद्याप देण्यात आलेली नाही. कोरोना चाचणीच्या नावाखाली सिटी स्कॅन करुन छातीतील संसर्गाची माहिती देण्यात येत आहे. ही चाचणी खर्चिक आहे.

जिल्हा रुग्णालयात मोफत तपासणी होत असली तरी अनेक जण गुजरात राज्यात धाव घेत आहेत. गुजरात राज्यात कोरोना चाचणी करुन तेथेच उपचार घेण्याचे प्रकार सध्या घडत आहेत.

जिल्ह्यात आरटीपीसीआर चाचण्या मोफत होत असल्या तरीही अनेक जण सिटी स्कॅन करण्यावर भर देत आहेत. यासाठी वाढीव खर्च होत आहे.

सिटी स्कॅन करण्यासाठी साधारण अडीच ते तीन हजार रूपयांचा खर्च येतो. शहादा आणि नंदुरबार येथे सिटी स्कॅनसाठी तोबा गर्दी आहे.