अधिक रुग्ण आढळणाऱ्या भागात कोरोना चाचणी मोहीम - डॉ. भारूड

जिल्हाधिकारी डाॅ. भारूड म्हणाले की, रुग्णवाढीचा दर कमी करण्यासाठी जिल्हास्तरावर वॉररूम तयार करण्यात येत असून तालुकास्तरावर नियंत्रण कक्ष तयार करण्यात येत आहे. या कक्षाद्वारे प्रत्येक कोरोनाबाधित व्यक्तींची माहिती घेण्यात येईल. कोरोनाविषयक औषधे मुबलक प्रमाणात आहेत. गावात पाचपेक्षा अधिक बाधित आढळल्यास प्राथमिक आरोग्य केंद्रस्तरावर अलगीकरण कक्ष तयार करण्याच्या सूचना देण्यात आल्या आहेत. प्रत्येक ग्रामीण रुग्णालय आणि प्राथमिक आरोग्य केंद्राच्या ठिकाणी उपचाराच्या सुविधा निर्माण कराव्या. गावात नव्याने रुग्ण आढळल्यास त्याच्यावर प्राथमिक आरोग्य केंद्रात उपचार करावे. अधिक रुग्ण आढळल्यास अलगीकरण कक्ष तयार करावा. प्रत्येक कोरोनाबाधित व्यक्ती अलगीकरण कक्षातच दाखल होईल, याविषयी दक्षता घ्यावी. ग्रामीण भागात अलगीकरण कक्ष वाढविण्याचे प्रयत्न करण्यात येत आहेत. ५९२ गावांत एकही कोरोनाबाधित रुग्ण नाही. लसीकरणासाठी ५२ लसीकरण केंद्रे असून त्यापैकी तीन खासगी आहेत. ग्रामीण भागात लसीकरण कमी आहे. कोरोना नियंत्रणासाठी लसीकरण वाढविणे महत्त्वाचे आहे. ग्रामसेवकांनी गावातील पात्र व्यक्तींचे १०० टक्के लसीकरण करून घ्यावे. निवडणूक केंद्रस्तरीय अधिकाऱ्यांची यासाठी मदत घ्यावी. स्थानिक वाहनांची सुविधा उपलब्ध करून देत नागरिकांचे लसीकरण करावे, असे आवाहन त्यांनी केले.

प्राथमिक आरोग्य केंद्र परिसरात अलगीकरण कक्ष स्थापन करण्याच्या सूचना देण्यात आल्याचे यावेळी जि.प.चे मुख्य कार्यकारी अधिकारी रघुनाथ गावडे यांनी सांगितले. बैठकीस उपविभागीय अधिकारी, तहसीलदार, गटविकास अधिकारी, तालुका वैद्यकीय अधिकारी, पोलीस विभागाचे अधिकारी उपस्थित होते.