नवापूर शहरातील गुजर गल्ली कोरोना हॉटस्पॉट; १५ दिवसांत सहा जणांचा मृत्यू

गुजर गल्लीत तीन क्लिनिक असून, या ठिकाणी नवापूर शहरातील मोठ्या प्रमाणात रुग्ण उपचारासाठी येत असल्याने मोठी वर्दळ असते. त्यामुळे या भागात कोरोनाची लागण झाल्याची चर्चा शहरात सुरू आहे. नगरपालिकेने अनेक वेळा निर्जंतुकीकरण केले आहे; परंतु नागरिकांचा हलगर्जीपणा यात दिसून येत आहे. तालुका प्रशासन उपाययोजना करीत असले तरी नागरिकांनी तोंडाला मास्क, फिजिकल डिस्टन्सिंग, हात स्वच्छ धुणे या तीन मूलमंत्रांचे पालन करणे गरजेचे आहे. नवापूर शहरातील दररोज कोरोना रिपोर्ट येत असल्याने, तसेच ॲम्ब्युलन्सचा आवाजदेखील धडकी भरवणारा आहे. नागरिकांनी कोरोनासंदर्भात काळजी घेणे गरजेचे आहे. विनाकारण बाहेर न निघता घरातच सुरक्षित राहावे, असे आवाहन तहसीलदार मंदार कुलकर्णी यांनी केले आहे.

नवापूर शहरातील बहुतांश खासगी डॉक्टर कोरोनाच्या मार्गदर्शक सूचनांप्रमाणे उपचार न करता घरीच औषध देऊन उपचार करीत असल्याने रुग्णांची परिस्थिती क्रिटिकल होत असल्याने शेवटच्या टप्प्यात रुग्ण रुग्णालयात दाखल होत असल्याने त्यांच्यावर उपचार करणे अवघड जात असून, त्यातून रुग्णांच्या मृत्यूचे प्रमाण वाढले आहे. नवापूर तालुक्यातील उपजिल्हा रुग्णालय, अल शिफा रुग्णालय मिशन हॉस्पिटल याठिकाणी कोविड सेंटर सुरू असून, येथे अनेक रुग्ण कोरोनाचा उपचार घेत आहेत.

दोन्ही राज्यांतील सीमा सीलबंद झाल्याने ृरुग्णांचे हाल

नवापूर शहर महाराष्ट्र व गुजरात सीमावर्ती भागात असल्याने बहुतांश रुग्ण उपचारासाठी गुजरात राज्यातील सोनगड, व्यारा, बारडोली, सुरत, नवसारी या परिसरामध्ये उपचार घेण्यासाठी जात आहेत. सुरत येथील सरकारी व खासगी रुग्णालयाची परिस्थितीदेखील नाजूक झाली. सर्वच रुग्णालये हाऊसफुल झाली आहेत. महाराष्ट्र व गुजरात राज्य सरकारने राज्याच्या सीमा सील केल्याने याचा मनस्ताप कोरोना रुग्णांना सहन करावा लागत आहे.

नंदुरबार जिल्हा व नवापूर तालुका कोरोना रिपोर्ट

नवापूर तालुक्यातदेखील कोरोनाने डोकेवर काढले आहे. नवापूर तालुक्यात नऊ हजार ३१३ रुग्णांचे स्वॅब घेण्यात आले आहेत. एक हजार ४४५ कोरोना रुग्ण आढळून आले आहेत. ५०५ जण कोरोना आजारावर उपचार घेत असून, २४ जणांचा मृत्यू झाला आहे. ९१७ रुग्ण कोरोना नियंत्रित झाले आहेत.

नंदुरबार जिल्ह्यात आतापर्यंत ९१ हजार ५३८ लोकांचे स्वॅब घेण्यात आले. त्यापैकी १६ हजार ५६० कोरोना रुग्ण आढळून आले आहे. चार हजार ८३५ रुग्ण उपचार घेत असून, २८७ रुग्णांचा मृत्यू झाला आहे, तर ११ हजार ४३५ रुग्ण कोरोना नियंत्रित झाले आहेत.

नवापुरात व्हेंटिलेटरची आवश्यकता

नवापूर तालुक्यातील कोरोनाचा वाढता प्रादुर्भाव पाहता रुग्णांची परिस्थिती खालावत असल्याने अनेकांना ऑक्सिजन लागत आहे, तर तालुक्यात व्हेंटिलेटरची कमतरता असल्याने रुग्णांना व्हेंटिलेटरवर ठेवण्यासाठी थेट नवापूरहून १२० किलोमीटर धुळे व सुरत येथे जावे लागत आहे. रुग्णाची हेळसांड थांबविण्यासाठी जिल्हा प्रशासनाने नवापुरात व्हेंटिलेटर उपलब्धता करण्याची मागणी होत आहे.

पाच दिवसांच्या फरकाने कोरोनात पती-पत्नीचे निधन

नवापूर शहरातील गुजर गल्लीमध्ये रमेश काशीराम पाटील सेवानिवृत्त शिपाई यांचे पाच दिवसांपूर्वी कोरोनाने निधन झाल्याने पाच दिवसांनंतर त्यांची पत्नी सकूबाई रमेश पाटील यांचे निधन झाले. त्यांच्या घरात दोन मुले असून, ती मूकबधिर आहेत. घरची आर्थिक परिस्थिती नाजूक असून, पाटील परिवारावर दुःखाचा डोंगर कोसळला आहे.