कोरोनामुळे विद्यार्थांच्या शिक्षणावर विपरित परिणाम

शासनाने कोरोनामुळे शाळा बंद केल्यावर ऑनलाइन शिक्षणाचा पर्याय निवडला. अनेक पालकांकडे अँड्रॉइड मोबाइल आहेत. म्हणून त्यांच्या पालकांनी आपल्या पाल्याला ऑनलाइन क्लासेस जॉइन करून दिले. मात्र, अनेक कारणामुळे मुलांच्या ऑनलाइन शिक्षणात सातत्य नव्हते. कारण अनेक वेळा ऑनलाइन क्लास चालू असताना, नातेवाईक अथवा इतर लोकांचे फोन किंवा कंटाळल्यामुळे अनेक मुले मध्येच गेम अथवा शिकविण्याकडे लक्ष नसल्यामुळे ऑनलाइनचा पाहिजे तितका फायदा विद्यार्थ्यांना झाला नाही.

तर अनेक पालकांकडे अँड्रॉइड मोबाइल नसल्यामुळे त्यांच्या पाल्यांना ऑनलाइन शिक्षण घेता आले नाही. परिणामी, ग्रामीण भागात ऑनलाइन शिक्षणाचे तीनतेरा वाजल्याचे दिसत आहे. त्यामुळे पालकांमध्ये चिंतेचे वातावरण दिसत आहे.

अनेकांनी ऑनलाइन शिक्षण घेतले असले, तरी नियमित शाळा चालू असताना मुले घरी जसा अभ्यास करतात. तसा अभ्यास या वर्षी घरी मुलांचा झाला नाही. शाळेत विद्यार्थ्यांना शिक्षकांचा धाक असतो. घरी ऑनलाइन शिक्षण घेताना, कुणाचाही धाक नसल्याने त्याचा विपरित परिणाम मुलांच्या शिक्षणावर दिसून येत आहे. सुशिक्षित पालक मुलांना घरी थोडे-फार शिकवतात. मात्र, अशिक्षित पालक आपल्या पाल्यांना शिकवू शकत नाही. त्यामुळे या वर्षी मुले वरच्या वर्गात गेले असले, तरी त्यांचा शैक्षणिक विकास झाला नसल्याचे चित्र दिसत आहे.