वीज कंपनीकडून ग्राहकांची अडवणूक

तळोदा शहरात अनेक महिन्यांपासून वाढीव वीज बिल, विनारीडिंग वीजबिल, रीडिंगनुसार वीज बिल येणे, अशा तक्रारी वाढल्या आहेत. ज्यादा येणाऱ्या वीज बिलांमुळे सर्वसामान्यांना मोठा फटका बसत आहे. लॉकडाऊनच्या काळात अनेक ग्राहकांना रीडिंग न घेता अंदाजे बिले पाठवण्यात आली. या सर्व प्रकारामुळे वीज ग्राहकांनी वीज बिल भरण्यात असमर्थता दाखवली तर काही ग्राहकांनी टप्प्याटप्प्याने वीज बिल भरणे पसंद केले. असे असले तरी नागरिकांच्या वाढीव वीज बिलासंदर्भात अनेक तक्रारी असताना वीज वितरण कंपनीने मात्र नागरिकांच्या तक्रारींकडे सर्रासपणे दुर्लक्ष केले आहे. लोकांनी आमच्याकडे लेखी तक्रारी द्याव्यात, असे वीज वितरण कंपनीकडून सांगण्यात येते. परंतु अनेक जणांनी लेखी तक्रारी देऊनदेखील त्या समस्यांचे पूर्णपणे समाधान झाले नसल्याचा अनुभव आहे. अनेकदा लेखी तक्रार आल्यावर वीज वितरण कंपनीकडून फी भरायला लावून दुसरे मीटर रीडिंग तपासले जाते. मात्र या प्रक्रियांमुळे ग्राहकांचे समाधान होत नाही. कारण ग्राहकांना त्याबद्दल तांत्रिक ज्ञान नसल्याने वीज वितरण कंपनीकडून रीडिंग बरोबर येत असल्याचे थातूरमातूर उत्तरे दिली जातात.

काही ग्राहकांना जादा वीज बिल येत असले तरी ग्राहक अर्ज व कागदपत्रांच्या प्रक्रियेत अडकणे पसंत करत नाही. बहुतेक ग्राहक हे जादा वीज बिल आले तरी कटकट नको म्हणून वीज बिल भरून मोकळे होतात. मात्र वीज वितरण कंपनीला वारंवार लेखी सूचना करूनदेखील कोणत्याही प्रकारची कार्यवाही कंपनीकडून करण्यात येत नाही.

वाढीव वीज बिलांसदर्भात काही प्रमाणात लेखी तक्रारी आल्या आहेत. त्याचे निराकरण होत असून, आणखी काही ग्राहकांच्या बिलाबाबत तक्रारी असतील तर ती लेखी द्यावी.

- इम्रान पिंजारी, सहायक अभियंता, वीज वितरण कंपनी, तळोदा

वाढीव वीज बिलांची समस्या तळोदा शहरात मोठ्या प्रमाणात आहे. नागरिकानी या विरोधात ग्राहक मंच, ग्राहक पंचायतीकडे तक्रार करावी. त्यांना संपूर्ण मदत करून वीज वितरण कंपनीच्या विरोधात कायदेशीर लढाई लढण्यात येईल. - राजेश चौधरी, जिल्हा संघटक, महाराष्ट्र ग्राहक पंचायत, नंदुरबार जिल्हा