ग्रामीण भागात लसीकरणास सुरुवात

नवापूर मतदारसंघात कोरोनाचा प्रादुर्भाव वाढत असल्याने मुख्यमंत्री उद्धव ठाकरे, आरोग्यमंत्री राजेश टोपे यांनी सांगितल्याप्रमाणे तोंडाला मास्क, फिजिकल अंतर व वारंवार हात स्वच्छ धुवावे. तसेच कोरोनाची लक्षणे दिसल्यास त्वरित वैद्यकीय सल्ला घ्यावा. घरी स्वतःच उपचार करू नये. कोरोनाची माहिती लपवू नये. नवापुरात लवकरच कोरोना नियंत्रित होईल, असे आवाहन आमदार शिरीष नाईक यांनी केले. या वेळी दुसरा कोरोना डोस घेण्यासाठी उपजिल्हा रुग्णालयात पोलीस निरीक्षक बाळासाहेब भापकर यांच्यासह सहकाऱ्यांनी लस घेतली. दररोज १०० च्या वर नवापूर उपजिल्हा रुग्णालयात लसीकरण केले जात असल्याची माहिती वैद्यकीय अधीक्षिका कीर्तिलता वसावे यांनी दिली.

नवापूर तालुक्यातील ग्रामीण भागात विसरवाडी, खांडबारा ग्रामीण रुग्णालय आणि पळसून, उमराण, चिंचपाडा, वावडी, डोगेगाव व धनराट या प्राथमिक आरोग्य केंद्रांत सोमवारपासून कोरोना प्रतिबंधात्मक लस देण्यात येत आहे. आरोग्य सेतू किंवा को-विन ॲपवरून ६० वर्षांपुढील ज्येष्ठ नागरिक व ४५ वर्षाच्या पुढील व्याधीग्रस्त नागरिक आणि रजिस्ट्रेशन केलेल्यांना लस दिली जात आहे, अशी माहिती वैद्यकीय अधिकारी डॉ. प्रमोद वळवी यांनी दिली.

जिल्ह्यासह राज्यात कोरोना रुग्णांची संख्या दिवसेंदिवस वाढत असून, धोकाही वाढला आहे. नंदुरबार जिल्ह्यात दररोज कोरोना रुग्णांचा आलेख वाढत असून, विसरवाडी येथील शाळा १६ ते २० मार्चपर्यंत बंद ठेवण्याचा निर्णय घेण्यात आला आहे. कोरोनावर प्रतिबंधक उपाय सुरू असून, मास्क वापरणे बंधनकारक केले आहे. तर विसरवाडी ग्रामपंचायत व पोलीस प्रशासनातर्फे व्यापारी बांधवांची बैठक घेऊन गुरुवारी भरणारा आठवडे बाजारही बंद करण्याचा निर्णय घेण्यात आला आहे. नवापूर तालुक्यातील ग्रामीण भागातील ग्रामस्थ मात्र लसीकरणाची वाट पाहत होते. दरम्यान, आता लसीचे आगमनही ग्रामीण भागात झाले असल्याने जनसामान्यांतून समाधान व्यक्त होत आहे.