तळोदा शहरातही मुंबई मार्गानेच झाला कोरोनाचा शिरकाव

लोकमत न्यूज नेटवर्क
कोठार/तळोदा : शहरातील एकास कोरोनाचा संसर्ग झाला आहे़ संसर्ग झालेला रुग्ण दोन दिवसांपूर्वी मृत्यू झालेल्या वृद्ध महिलेचा मुलगा असून त्याचा अहवाल पॉझिटिव्ह आल्यानंतर मोठा माळीवाडा कंटेन्मेंट झोन म्हणून घोषित करण्यात आला आहे़ दरम्यान मयत महिला ठाणे येथून परतली असल्याने तळोद्यातही मुंबई मार्गानेच कोरोना आल्याचे स्पष्ट झाले आहे़
५ जून रोजी ठाणे येथून ७२ वर्षीय महिला कुटुंबासह तळोद्यात परतली होती. या महिलेला कोरोनासदृश लक्षणे होती. त्यातच तिचा शुक्रवारी मध्यरात्री मृत्यू झाला होता. आरोग्य व महसूल विभागाला ही माहिती मिळाल्यानंतर त्यांनी तातडीने येथे धाव घेत मयत महिलेचे नातलग आणि संपर्कात आलेल्या १४ जणांना आमलाड येथे क्वारंटाईन कक्षात हलवले होते़ दरम्यान मयताच्या ४० वर्षीय मुलाचा स्वॅब घेण्यात येऊन तपासणीसाठी जिल्हा रुग्णालयात पाठवण्यात आला होता़ या स्वॅबचा अहवाल सोमवारी सायंकाळी प्राप्त झाल्यानंतर प्रशासनाने मोठा माळीवाडा परिसर सील करुन आवश्यक ती फवारणी करुन पाहणी केली़ पालिकेच्या आरोग्य विभागाने ही फवारणी केली़ प्रशासनाकडून तातडीने हा परिसर कंटेन्मेंट झोन म्हणून जाहिर करण्यात आला आहे़ आरोग्य विभागाने संध्याकाळीच घरोघरी जाऊन सर्वेक्षण सुरु केला होता़ मयत वृद्ध महिलेवर उपचार करणाऱ्या दोघा डॉक्टरांनाही दवाखाने बंद करण्याच्या सूचना वैद्यकीय यंत्रणेने दिल्या आहेत. पॉझिटिव्ह म्हणून समोर आलेल्याच्या संपर्कात आलेल्यांचा शोध घेण्यात येत असून रात्री उशिरापर्यंत माहिती घेतली जात होती़ उपजिल्हाधिकारी अविशांत पंडा, तहसीलदार पंकज लोखंडे, तालुका आरोग्य अधिकारी डॉ़ महेंद्र चव्हाण, मुख्याधिकारी सपना वसावा, पोलिस निरीक्षक राजेश शिंगटे, पालिकेचे प्रभारी आरोग्य निरीक्षक अश्विन परदेशी हे रात्री उशिरापर्यंत या भागात तपासणी करत होते़
नागरिकांनी घाबरून न जाता सतर्कता बाळगण्याचे आवाहन प्रशासनाकडून करण्यात येत आहे़ रात्री उशिरापर्यंत अधिकारी मोठा माळीवाडा भागात नागरिकांची भेट घेऊन त्यांना दिलासा देत जनजागृती करत होते़

सर्वत्र कोरोनाचे रुग्ण आढळून येत असताना तळोद्यात एकही रुग्ण आढळून आला नव्हता़ महसूल, आरोग्य, पालिका आणि पोलीस प्रशासनाने यासाठी मेहनत घेतली होती़ परंतू ठाणे येथून परतलेल्या कुटूंबामुळे तळोद्यातही कोरोनाचा शिरकाव झाला आहे़ यामुळे नागरिकांमध्ये चिंता आहे़ बाहेरगावाहून शहर अथवा तालुक्यात येणाऱ्यांनी संपर्क करण्याचे आरोग्य विभागाने कळवले आहे़ तालुका वैद्यकीय अधिकारी महेंद्र चव्हाण यांच्यासह आरोग्य पथक मोठा माळीवाडा भागात उशिरापर्यंत सर्वेक्षण करत होते़