लाॅकडाऊनचे नागरिकांना भान, दस्त नोंदणी कार्यालयही सुनसान

नंदुरबार : जिल्ह्यात लाॅकडाऊनचे काटेकाेरपणे पालन करण्यात येत आहे. यातून जिल्ह्यातील जमीन खरेदी व विक्रीसह त्यासंबंधातील इतर आर्थिक व्यवहारही पूर्णपणे रद्द करण्यात आले असून यामुळे मुद्रांक व दस्त नोंदणी कार्यालयही सुने पडले असल्याचे दिसून आले आहे. याठिकाणी सद्यस्थितीत केवळ एक किंवा दोन व्यवहार होत आहेत.

नंदुरबार येथील जुने तहसील कार्यालयाच्या आवारात असलेल्या मुद्रांक नोंदणी व दुय्यम निबंधक कार्यालयात एरवी गर्दी मावत नसल्याचे वेळोवेळी दिसून येत होते. दिवसाला जमिनी व घरांच्या खरेदी-विक्रीच्या व्यवहारांसह गहाणखतांचे किमान ३० ते ३२ व्यवहार या कार्यालयात दैनंदिन होत होते. यातून साधारण ४० कोटी रुपयांची उलाढाल होत होती. या उलाढालीमुळे जिल्ह्याला महसूल मिळत होता. आर्थिक व्यवहारांनुसार जिल्ह्याला महिन्याकाठी साधारण ३० कोटी रुपयांचा महसूल मिळत असल्याचे स्पष्ट करण्यात आला आहे. महिन्याकाठी ३०० किंवा त्यापेक्षा अधिक खरेदी विक्रीचे व्यवहार होऊन त्यातून हा महसूल मिळत होता. तूर्तास मात्र हे व्यवहार बंद असल्याने हा महसूल बुडाला आहे.