मयत महिलेची जमीन लाटण्याचा प्रयत्न करणाऱ्यांवर गुन्हा दाखल

याबाबत सविस्तर वृत्त असे की, काथर्दे, ता. शहादा शिवारात प्राची विकास मोहिते (रा.वसई, जि.पालघर) यांच्या आजी वासंतिकाबाई दामोदर जोशी यांच्या मालकीची वडिलोपार्जित व कब्जे उपभोगातील ६ हे. ६९ आर. एवढी शेतजमीन आहे. त्यांच्यातर्फे विश्वास श्रीकृष्ण पाटील (रा.डामरखेडा) हे या शेतजमिनीची खेड व मशागत करतात. तसेच विश्वास पाटील हे त्यांचे जनरल मुखत्यारदेखील आहेत. प्राची मोहिते यांचे लग्नापूर्वीचे नाव प्राची विश्वनाथ जोशी असे होते. त्यांच्या वडिलांचे नाव विश्वनाथ दामोदर जोशी असे तर आजीचे नाव वासंतिका दामोदर जोशी असे होते. वासंतिका जोशी यांचे ११ ऑक्टोबर २००३ रोजी मुंबई येथे निधन झाले असून तसा मृत्यू दाखलादेखील आहे. असे असताना एका अज्ञात महिलेस वासंतिका जोशी जिवंत असल्याचे भासवून व त्यांचे विशेष कुलमुखत्यार असल्याचे भासवून ४ मे २०१८ रोजी शहादा दुय्यम निबंधक कार्यालयात मयत वासंतिका जोशींच्या शेतीचे खरेदी खत राहुल मोतीराम निकम (लिहून देणार) याने राजेंद्र विष्णू इंगळे ( लिहून घेणार) याच्या नावाने खरेदी खत नोंदवून दिले आहे. संबंधित तोतया महिलेस प्रशांत कृष्णराव जोशी याने संगनमत करून त्याचे रेशनकार्डात वासंतिका जोशी वय ७८, काकू असे नाव समाविष्ट केल्याचे आणि त्याआधारे खोटे व बनावट आधारकार्ड तयार केल्याचे तक्रारदार विश्वास पाटील यांना माहितीच्या अधिकारात माहिती मिळाली आहे. बनावट खरेदी खताच्या आधारे शेतीच्या नावात फेरफार नोंद होऊ नये म्हणून तक्रारदार पाटील यांनी तहसीलदार शहादा यांच्याकडे तक्रार दाखल केली होती. तहसीलदार यांनी मंडळ अधिकारी कलसाडी यांना चौकशीचे आदेश दिले असता मंडळ अधिकाऱ्यांनी संबंधित वासंतिका जोशी ही महिला तोतया आहे किंवा नाही याबाबत तपास करण्यासाठी पोलीस प्रशासनाची मदत घेण्याबाबतचा अहवाल तहसीलदारांना दिला होता. याप्रकरणी सदर तोतया महिला व या गुन्ह्यात तिला साथ देणाऱ्या साथीदारांविरोधात गुन्हा दाखल करण्यासाठी तक्रारदार यांनी पोलीस निरीक्षक शहादा यांना ६ फेब्रुवारी २०२० रोजी रजिस्टर पोस्टाने फिर्याद पाठवूनही पोलिसांनी कोणतीही कारवाई न केल्याने २४ फेब्रुवारी २०२० रोजी जिल्हा पोलीस अधीक्षक नंदुरबार यांनाही फिर्याद पाठविण्यात आली. मात्र त्यांच्याकडूनही कार्यवाही न झाल्याने अखेर तक्रारदार विश्वास पाटील यांनी प्रथमवर्ग न्यायदंडाधिकारी शहादा यांच्या न्यायालयात अर्ज दाखल केला होता. ॲड. प्रीतेश जैन यांनी न्यायालयात फिर्यादीतर्फे बाजू मांडली. याप्रकरणी न्यायालयाने संबंधित तोतया महिला, राहुल निकम, राजेंद्र इंगळे व प्रशांत जोशी यांच्याविरोधात भा.दं.वि. कलम ४०४, ४१९, ४२०, ४६५, ४६८, ४७१, ३४ अन्वये गुन्हा दाखल करून तपास करण्याचे आदेश शहादा पोलिसांना दिले आहेत.

न्यायालयाच्या आदेशान्वये चौघांवर पोलिसात गुन्हा दाखल

फिर्यादी विश्वास पाटील यांच्या बाजूने निकाल देत न्यायालयाने चौघा आरोपींविरोधात गुन्हा दाखल करण्याचे आदेश पोलिसांना दिले होते. त्यानुसार शहादा पोलिसात तोतया महिला, राहुल निकम, राजेंद्र इंगळे व प्रशांत जोशी या चौघा आरोपींविरोधात गुन्हा दाखल झाला आहे. या प्रकरणात बनावट रेशनकार्ड, आधारकार्ड तयार करणाऱ्यांचीही चौकशी होण्याची शक्यता असल्याने पोलीस तपासात आरोपींची संख्या वाढण्याची शक्यता आहे.