शिस्तभंगानंतर पदभार काढण्याच्या सीईओंच्या आदेशांकडे झाले दुर्लक्ष

२०१६-१७ या आर्थिक वर्षात मोबाईल मेडिकल युनिटमध्ये गैरव्यवहार झाल्याच्या तक्रारी झाल्यानंतर जिल्हा आरोग्य विभागाने त्रिस्तरीय समिती नियुक्त केली होती. समितीने मोबाईल मेडिकल युनिटमध्ये केलेल्या खर्चाचा हिशेब गोळा करत युनिट चालवणारे तत्कालीन तालुका वैद्यकीय अधिकारी हे दोषी असल्याचा अहवाल तत्कालीन मुख्य कार्यकारी अधिकारी आर.बी. सोमवंशी यांनी दिला होता. हा अहवाल गांभीर्याने घेत तिघांना नोटिसा बजावत शासनाकडून प्राप्त निधीचा दुरुपयोग करून प्रशासनात नियमबाह्य व गैरवर्तन केल्यामुळे महाराष्ट्र नागरी सेवा (वर्तणूक) नियम १९७९ च्या कलम तीनचे उल्लंघन केल्यामुळे शिस्तभंगाच्या कार्यवाहीस पात्र असल्याचे म्हटले होते. यातून ही चाैकशी अपूर्ण असल्याने त्यांच्याकडील पदभार काढून घेणे क्रमप्राप्त होते; परंतु यातील दोघे तालुका वैद्यकीय अधिकारी, तर एक वैद्यकीय अधिकारी म्हणून कार्यरत आहे. आरोग्य विभागातील सूत्रांच्या म्हणण्यानुसार चाैकशी अपूर्ण असल्याने तिघांकडील पदभार काढणे अपेक्षित होते; परंतु तशी कोणतीही कार्यवाही गेल्या चार वर्षांत झालेली नाही. तालुका वैद्यकीय अधिकारी म्हणून कार्यरत असताना आर्थिक व्यवहारांसाठी शासनाच्या नियमांची अंमलबजावणी करणे गरजेचे असतानाही तिघांकडून तशी पूर्तता न झाल्याने हा आर्थिक गैरव्यवहार झाल्याचे उजेडात आले होते.

दरम्यान वावडी, ता. नवापूर मेडिकल युनिटमधील गैरव्यवहाराच्या आरोपांखाली चाैकशी करण्यात आलेले डाॅ. शशिकांत वसावे अद्यापही नवापूरचे तालुका वैद्यकीय अधिकारी आहेत. सध्या ते वैद्यकीय रजेवर असल्याची माहिती देण्यात आली आहे. धनाजे, ता. धडगाव येथील युनिटमधील गैरव्यवहाराचे आरोप असलेले डाॅ. दिनेश वळवी हे धडगाव तालुका वैद्यकीय अधिकारी आहेत तर बोरद युनिटमधील गैरव्यवहाराचा ठपका ठेवण्यात आलेल्या डाॅ. रेखा शिंदे या सध्या बोरद प्राथमिक आरोग्य केंद्राच्या वैद्यकीय अधिकारी आहेत. ज्या आरोग्य केंद्राच्या युनिटमध्ये गैरव्यवहार झाला त्याचा ठिकाणी त्या वैद्यकीय अधिकारी असल्याने आरोग्य विभागातून आश्चर्य व्यक्त केले जात आहे.