बेडवरून उठताही येत नाही, घरी येऊन दिली जाणार लस

नंदुरबार : दिव्यांग व ज्येष्ठ नागरिकांना घराजवळील केंद्रावर किंवा घरी जाऊन लस देण्याबाबत राज्य शासनाकडून सूचना प्राप्त झाल्या आहे. स्थानिक पातळीवर त्या दृष्टीने नियोजन केले जात आहे. त्यामुळे अशा नागरिकांना हा एक दिलासा मिळणार आहे.

केंद्रांवर जाणे कठीण

जिल्ह्यात ज्येष्ठांचे लसीकरण सुरू करण्यात आले आहे. मात्र, अनेकांना केंद्रापर्यंत जाणे कठीण होत असल्याने लस घेण्यात अडचणी निर्माण होत असल्याने अशा नागरिकांसाठी ही सुविधा करण्यात येणार आहे.

काही दिवसांपूर्वी शासनाकडून याबाबत जिल्हा आरोग्य यंत्रणेला पत्र प्राप्त झाले आहे. शिवाय याआधीही दिव्यांग व ज्येष्ठांच्या सोयीच्या लसीकरणासाठी त्यांच्या घराशेजारी किंवा स्वतंत्र सेशन अशा पद्धतीने स्थानिक पातळीवर नियोजन केले जात होते.

आता याबाबत सूचनाच प्राप्त झाल्या असून, याबाबत नव्याने काय करता येईल, याबाबत नियोजन सुरू करण्यात आले आहे.

दरम्यान, जिल्ह्यात अद्यापही ३१ टक्केच ज्येष्ठ नागरिकांचे दोनही डोस घेऊन झालेले आहेत, तर ४५ टक्के नागरिकांनी लसीचा पहिला डोस घेतला आहे. त्यामुळे उर्वरित ज्येष्ठ नागरिकांचे लसीकरण करून घेणे प्रशासनासमोर मोठे आव्हान राहणार आहे.