शहाद्यात धाडसी घरफोडी, पावणेचार लाखांचा ऐवज लंपास

पोलिस सूत्रांकडून मिळालेल्या माहितीनुसार जुना मोहिदा रस्त्यावरील मानस विहार कॉलनीतील रहिवासी सतीश विश्वासराव पाटील हे बाहेर गावी गेले असता घराच्या लोखंडी दरवाजाच्या कोंडा तोडून लाकडी दरवाजाचे कुलूप कापून अज्ञात चोरट्यांनी घरात प्रवेश केला. घरात असलेल्या कपाटाचे कुलूप तोडून त्यातील सामान अस्ताव्यस्त केला तसेच कपाटात असलेले एक लाख ७५ हजार रुपये रोख व दोन लाख १० हजार रुपये किमतीचे सोन्या-चांदीचे दागिने असे एकूण तीन लाख ८५ हजारांचा ऐवज लंपास केला. सतीश विश्वासराव पाटील यांनी दिलेल्या फिर्यादीनुसार शहादा पोलीस ठाण्यात अज्ञात चोरट्याविरुद्ध गुन्हा दाखल करण्यात आला असून पुढील तपास पोलीस निरीक्षक दीपक बुधवंत करीत आहेत.

दरम्यान, या अगोदर आठ दिवसांपूर्वी याच भागातील रहिवासी असलेले सुहास कुलकर्णी यांची व इतर दोन व्यक्तींच्या दोन अशा तीन मोटारसायकली हॅण्डल लॉक व कुलुपबंद असतांनाही अज्ञात चोरट्यांनी चोरून नेल्या होत्या. परिसरात होणाऱ्या चोऱ्यांमुळे शिक्षक कॉलनी, मानस विहार परिसरातील रहिवाशांमध्ये घबराटीचे वातावरण निर्माण झाले आहे. नवीन वसाहती दिवसेंदिवस वाढत आहे. या परिसरात रात्री पोलीस गस्त वाढवण्याची देखील मागणी होत आहे.