देवळफळीत तलवार व गुप्तीने वार करीत दोघांना केले जखमी; दोन संशयितांना अटक

नवापूर पोलीस सूत्रांकडून मिळालेल्या माहितीनुसार नवापूर शहरातील देवळफळी भागात राहत्या घराच्या मालकी हक्कावरून दोन गटांत हाणामारी झाली. यासंदर्भात तुकाराम मंगा कोकणी, वय 50 यांच्या फिर्यादीवरून संशयित आरोपी प्रदीप शामुवेल कुवर, तुकाराम गिरधर वसावे, दोघे रा. देवळफळी, नवापूर यांच्या विरोधात गुन्हा दाखल करण्यात आला आहे. या घटनेत तुकाराम मंगा कोकणी, वय 50, राकेश मंगा कोकणी, वय 29, दोघे रा. पंपहाऊस, देवळफळी, नवापूर हे जखमी झाले आहेत. त्यांच्यावर नवापूर उपजिल्हा रुग्णालयात उपचार करण्यात आले.

तुकाराम मंगा कोकणी यांनी दिलेल्या फिर्यादीत म्हटले आहे की, लोखंडी तलवार, पँटच्या खिशात गुप्ती घेऊन प्रदीप कुवर याने घरात अनधिकृत प्रवेश करून तुम्ही हे घर सोडून द्या नाही तर तुम्हाला सर्वांना मी मारून टाकीन अशी धमकी देत दुखापत करून शिवीगाळ केली. घराबाहेर अंगणात येऊन तुकाराम गिरधर वसावे याने प्रदीप कुवरला सांगितले की, तू यांना मारून टाक, मी तुझा बाजूने कोर्टात केस चालवील व तुला निर्दोष सोडून आणील, अशी चिथावणी दिल्याने प्रदीप कुवर पोटावर, हातावर सशस्त्र हल्ला करून ठार मारण्याचा प्रयत्न केला, अशी फिर्याद दिली असून, नवापूर पोलीस ठाण्यात भादंवि कलम 307, 452, 323, 504, 506, 34 सह भारतीय हत्यार कायदा कलम 4/25

प्रमाणे गुन्हा दाखल करण्यात आला आहे. दोन्ही आरोपींना अटक केली आहे. पुढील तपास सहायक पोलीस निरीक्षक धीरज महाजन करीत आहेत.