पुस्तक प्रकाशन कार्यक्रम

महाराष्ट्रासह देशाच्या बहुतांश आदिवासी पट्ट्यात नक्षलवादाने ठाण मांडले आहे. जंगलावर जीवन असलेल्या आदिवासींना नक्षलवादी वेठीला का धरत आहेत? एखाद्या विचारसरणीच्या तत्त्वात आणि आचरणात तफावत का निर्माण होते? आदिवासी समाज पोलीस आणि नक्षल यापैकी कोणाकडे झुकतो आहे? या विचारसरणीच्या प्रभावाने आदिवासी समाज सुखी झाला आहे का? अस्वस्थ करणाऱ्या अशा अनेक प्रश्नांचा ऊहापोह ‘स्थलांतर’ या विश्वकर्मा प्रकाशित कादंबरीत करण्यात आला आहे. तर मानव जातीचे कल्याण करू पाहणारे आणि त्याचा गर्व वाहणारे वैज्ञानिक, त्यांच्या ज्ञानाचा वापर नफेखोरीसाठी करणाऱ्या कंपन्या, त्यांचे गर्वहरण करणारा निसर्ग आणि या सर्वांमधून वाहत असणारा मानवीय संबंधाचा झुळझुळता झरा यांचे मर्म ओघवत्या भाषेत ‘चिरंतन’ या ग्रंथाली प्रकाशित कादंबरीत मांडण्यात आले आहे. विज्ञान भानासोबत मूल्यभान जागवणारी ही एक कादंबरी आहे. त्याप्रमाणे ‘आत्मा आणि इतर कथा’ या प्रशांत प्रकाशित कथासंग्रहात विविध कथांचा समावेश आहे.

‘चिरंतन’ कादंबरीचे प्रकाशन डॉ. उज्ज्वला दळवी व डॉ. चारुता गोखले यांच्या हस्ते करण्यात येणार आहे. प्रकाशक धनंजय गांगल हेदेखील उपस्थित राहणार आहेत. स्थलांतर या कादंबरीचे प्रकाशन संदीप तापकीर व डॉ. फुला बागुल यांच्या हस्ते करण्यात येणार आहे. या वेळी प्रकाशक मनोहर सोनवणे उपस्थित राहणार आहेत. ‘आत्मा आणि इतर कथा’ या कथासंग्रहाचे प्रकाशन माधुरी तळवलकर यांच्या हस्ते करण्यात येणार आहे. या वेळी प्रकाशक प्रदीप पाटील हे उपस्थित राहणार आहेत, अशी माहिती आयोजकांनी दिली.