काळ्या बाजारात जाणारा रेशनचा तांदूळ दहेल येथे जप्त

नंदुरबार : काळ्या बाजारात जाणारा रेशनचा साडेनऊ क्विंटल तांदूळ जप्त करण्यात आला. याप्रकरणी तीन जणांना अटक करण्यात आली असून वाहनदेखील जप्त करण्यात आले आहे. दहेलचा कसरखाडीपाडा, ता, अक्कलकुवा येथे ही घटना घडली.

दिलीप भांगडा वळवी, रा.दहेलचा करसखाडीपाडा, भिका डुटल्या वसावे व दातक्या राज्या वसावे, रा.कोठली, ता.अक्कलकुवा असे अटक करण्यात आलेल्या संशयीतांची नावे आहेत. गावातील शासकीय रेशन दुकानातून तांदूळ काळ्या बाजारात विक्रीस जात असल्याची माहिती मिळाल्यावर ग्रामस्थांनी पाळत ठेऊन वाहन (क्रमांक एमएच २९- जे ०२५५) अडविले. त्याची तपासणी केली असता त्यात ५० किलो वजनाचे १९ पोते आढळून आले. एकूण साडेनऊ क्विंटल तांदूळ होता.

याबाबत अक्कलकुवा येथे पुरवठा निरीक्षण कार्यालयात कळविण्यात आल्यानंतर पुरवठा निरीक्षक सुरेश दौलत चौधरी यांनी मोलगी पोलीस ठाण्यात फिर्याद दाखल केली. त्यांच्या फिर्यादीवरून दिलीप वळवी, भिका वसावे व दातक्या वसावे यांच्याविरुद्ध जीवनावश्यक वस्तू कायदा कलमान्वये गुन्हा दाखल करण्यात आला आहे. तपास पोलीस निरीक्षक निवृत्ती पवार करीत आहे.