फेसबूक अकाऊंटवरून पैसे मागितले तर सावधान..!

नंदुरबार : फेसबुक अकाऊंट हॅक करून किंवा बनावट अकाऊंट तयार करून त्या माध्यमातून पैशांची मागणी करण्याचे प्रकार वाढले आहेत. त्यातून अनेकजणांना आर्थिक फटका बसला आहे. अलीकडच्या काळात या तक्रारींचे प्रमाण वाढले असून सायबर पोलिसांकडेही तक्रारी दाखल आहेत.

आजच्या आधुनिक युगात लहान मुलांपासून ते वृद्धांपर्यंत प्रत्येकजण वेगवेगळ्या समाज माध्यमांवर सक्रिय असतात. त्यात फेसबुकचा वापर देखील मोठा आहे. ही बाब लक्षात घेऊन अनेक सायबर गुन्हेगार त्याचा उपयोग आर्थिक गुन्हे करण्यासाठी करीत असल्याचे दिसत आहे. अनेकांचे फेसबुक अकाऊंट हॅक केले जात असून त्या माध्यमातून मित्रांकडून पैशांची मागणी केली जात आहे. अडचणीत असल्याने तातडीने माझ्या अकाऊंटला पैसे पाठवा म्हणून विनवणी केली जाते. जवळचा मित्र किंवा नातेवाईक त्याला बळी पडून दिलेल्या अकाऊंट नंबरवर पैसे देखील टाकत असतात. सध्या हे प्रकार मोठ्या प्रमाणावर वाढले आहेत. त्यामुळे प्रत्येकाने आपले फेसबुक अकाऊंटचा पासवर्ड वेळोवेळी बदलत राहावा तसेच विनाकामाच्या आणि अश्लील साईट सर्च करू नये त्या माध्यमातूनच हे प्रकार वाढत असल्याचे बोलले जात आहे.