गृहभेटीद्वारे वाघोदा, राणीपूर व साबलापाणी येथे जनजागृती

सारंगखेडा : कोरोनाची साथ आटोक्यात आणण्यासाठी प्रतिबंधात्मक लसीकरणाचा वेग वाढावा, यासाठी प्रशासनाने ‘माझे कुटुंब, माझी जबाबदारी’ या मोहिमेंतर्गत प्रत्येक गावात सर्वेक्षण सुरू केले असून, गृहभेटीद्वारे जनजागृती करण्यात येत आहे. यासाठी ग्रामस्थांनी सहकार्य करावे, असे आवाहन तहसीलदार डॉ. मिलिंद कुलकर्णी यांनी केले आहे.

शहादा तालुक्यातील वाघोदा, राणीपूर, साबलापाणी आदी गावांना भेट देऊन त्यांनी ‘माझे गाव, माझे कुटुंब, माझी जबाबदारी’ या मोहिमेचा आढावा घेतला. दरम्यान, कर्मचाऱ्यांना लसीकरण वाढविण्यासंदर्भात सूचनाही दिल्या. ग्रामस्थांची प्रत्यक्ष भेट घेऊन आपल्याला कोरोनामुक्त तालुका करायचा आहे व त्यासाठी आपण आरोग्य पथकाला सहकार्य करा व आरोग्य तपासणी करून त्यात ऑक्सिजन पातळी, थर्मल स्कॅनिंग मशीनने ताप तपासून घ्या. तसेच ४५ वर्ष वयोगटातील प्रत्येकानी लसीकरण करून घ्या, त्यापासून शारीरिक इजा किंवा त्रास होणार नाही. खोट्या अफवांना बळी पडू नका, आपले आरोग्य आपणच सांभाळा, लक्षणे असल्यास त्वरित जवळच्या आरोग्य केंद्रात जाऊन तपासणी करून कोरोना चाचणी करून घ्या, आपला अहवाल पॉझिटिव्ह आल्यास घाबरून जाऊ नका, विलगीकरण कक्षात दाखल व्हा. जेणेकरून इतरांना आपल्यापासून संसर्ग होणार नाही, याची काळजी घ्या व प्रशासनाला सहकार्य करा, असे आवाहन तहसीलदार डॉ. कुलकर्णी यांनी तालुक्यातील वाघोदा, राणीपूर व साबलापाणी आदी गावांना दिलेल्या भेटीवेळी केले. यावेळी वाघोदाचे सरपंच सुभाष भिल, उपसरपंच गोपाल भिल, माजी उपसरपंच वासुदेव पाटील, तलाठी लक्ष्मण कोळी, ग्रामसेवक गंगाधर बुधवंत, मुख्याध्यापक हसरथ मोरे, मंडल अधिकारी गवळे, वीरेंद्र पाटील, चेतन पाटील, रमाकांत पाटील, सोमनाथ पाटील, लखन पाटील, उत्तम ठाकरे आदींसह ग्रामस्थ उपस्थित होते.