कोंबडी चोरांसह अट्टल गुन्हेगार पकडले

लोकमत न्यूज नेटवर्क
नंदुरबार : एलसबीच्या पथकाने शहरात घरफोडीच्या प्रयत्नातील तिघांसह अडीच लाखांच्या कोंबड्या चोरुन त्यांची विल्हेवाट लावणाऱ्या टोळीला ताब्यात घेतले आहे़ एलसीबीने नियुक्त केलेल्या तीन वेगवेगळ्या पथकांनी तब्बल सात गुन्हेगारांना ताब्यात घेतले आहे़
ताब्यात घेतलेल्या चोरट्यांपैकी एकाने तब्बल १७ जिल्ह्यात घरफोडी केल्याची कबुली दिली असून त्याचे दोन साथीदार पळून जाण्यात यशस्वी झाले़ तर पथकांनी बसस्थानक परिसरातून दोघा मोबाईल चोरट्यांना अटक केली़

ज्ञानदिप सोसायटीत अटक
गेल्या सहा महिन्यात नंदुरबार जिल्ह्यातील शहरी भागात घरफोडीचे गुन्हे वाढीस लागल्याने पोलीसांच्या कार्यक्षमतेवर प्रश्नचिन्ह निर्माण झाले होते़ यानुसार घरफोडीच्या गुन्ह्यांचा तपास करण्यासाठी पोलीस अधिक्षक महेंद्र पंडीत यांच्या मार्गदर्शनात एलसीबीने पथके तैनात केली होती़ दरम्यान नववर्षाच्या प्रारंभीच १ जानेवारी रोजी पोलीस निरीक्षक किशोर नवले यांना शहरातील धुळे रोडवरील ज्ञानदिप सोसायटी भागात एक अज्ञात चोरटा फिरत असल्याची माहिती मिळाली होती़ यानुसार पथकाने या भागात भेट देऊन माहिती घेतली असता, काळी बॅग पाठीशी लावलेला एक व्यक्ती फिरत असल्याचे दिसून आले़ त्याचा पाठलाग करुन पथकाने त्याला ताब्यात घेतले असता, त्याने उडवाउडवीची उत्तरे देत निसटण्याचा प्रयत्न केला़ पथकाने त्याला ताब्यात घेत चौकशी करुन बॅगची तपासणी केली असता, घरफोडीचे साहित्य मिळून आले होते़ त्याने इंदौर येथून दोन साथीदारांसह आल्याची माहिती देत शहर व शहराबाहेरील बंद घरांची पाहणी करुन चोरी करत असल्याची माहिती दिली़
पथकांनी त्याची अधिक चौकशी केली असता, धक्कादायक माहिती समोर आली़ ताब्यात घेतलेल्या चोरट्याचे नाव रोहित ऊर्फ अमित यादाव घनश्याम पाल रा़पांड्याखेडी उज्जैन असे असून त्याने साथीदार पवन ऊर्फ भुरा रामदास आर्य रा़ इंदौर व मनोज ऊर्फ राहुल ठाकुरदास कुमार रा़ भिंड (मध्यप्रदेश) यांच्यासोबत राज्यातील १७ जिल्ह्यांमध्ये ४२ ठिकाणी घरफोडी केल्याची केल्याची कबुली दिली़ त्याच्याकडून ३७ हजार रुपये रोख आणि घरफोडी करण्याचे साहित्य पोलीसांनी ताब्यात घेतले़
मोबाईल चोरटे अटकेत
अट्टल घरफोड्या आणि कोंबडीचोरांसोबत एलसीबीच्या पथकांनी दोन अट्टल मोबाईल चोर ताब्यात घेतले़ नंदुरबार बसस्थानक आवारात महागडे मोबाईल कमी दरात विक्री होत असल्याची माहिती एलसीबीला मिळाली होती़ त्यानुसार पथकाने याठिकाणी सापळा रचला असता दोघे मोबाईल विकत असल्याचे दिसून आले़ त्यांना ताब्यात घेतल्यावर त्यांच्याकडून ९८ हजार रुपये किमतीचे तब्बल १२ मोबाईल जप्त करण्यात आले़ हे मोबाईल त्यांनी सारंगखेडा यात्रोत्सव, नंदुरबार, धुळे आणि गुजरात राज्यातून चोरल्याची कबुली दिली आहे़ अंकुश ढेम्या पवार रा़ मुखेड जि़नांदेड व शंकर कमलाकर चव्हाण रा़ सेंधवा अशी दोघांची नावे आहेत़ त्यांच्याकडून चोरीचे आणखी गुन्हे उघडकीस येण्याची शक्यता आहे़
पोलीस अधिक्षक संजय पाटील, अप्पर पोलीस अधिक्षक चंद्रकांत गवळी यांच्या मार्गदर्शनात पोलीस निरीक्षक किशोर नवले यांच्यासह वेगवेगळ्या तीन पथकांनी चोरट्यांना ताब्यात घेत तिघे गुन्हे उघडकीस आणले़

अडीच हजार कोंबड्या चोरणारे तिघांची टोळी जेरबंद

नंदुरबार तालुक्यातील पाचोराबारी शिवारातील कासिम कय्यूम खाटीक यांच्या मालकीच्या पोल्ट्री फार्ममधून १ लाख ४६ हजार ९६० रुपयांच्या २ हजार ६७२ कोंंबड्या १७ डिसेंबर रोजी चोरीस गेल्याची घटना उघडकीस आली होती़ याप्रकरणी तालुका पोलीस ठाण्यात गुन्हा दाखल होता़ दरम्यान घटनेमुळे पोल्ट्री फार्म चालकही धास्तावले होते़ या घटनेचा तपास एलसीबीकडे सोपवण्यात आला होता़ एलसीबीचे पोलीस निरीक्षक नवले यांच्या मार्गदर्शनात पथकांनी शहराबाहेरील तसेच परराज्यातील विविध टोलनाक्यांची तपासणी करुन माहिती घेतली होती़ यात सोनगड (गुजरात) येथील टोलनाक्यावरच्या सीसीटीव्ही फुटेजमध्ये १० संशयास्पद वाहने आढळून आले होते़ यातील एक वाहन हे नंदुरबार शहरातील अन्वर शेख समीर याच्या मालकीचे असल्याचे समोर आले़ पथकाने त्याला २८ डिसेंबर रोजी ताब्यात घेत विचारपूस केली असता, त्याने १७ डिसेंबरच्या रात्री खामगाव शिवारातून कोंबड्या चोरी करुन अहमदाबाद येथील अस्लम नवाबखान रहीमखान पठाण याच्याकडे पोहोचवल्या होत्या़ यासाठी अन्वर यास मोहिनोद्दीन नामक व्यक्तीने २० हजार रुपये दिले होते़ पथकाने अहमदाबाद येथे जावून नवाबखान रहीमखान याच्याकडून कोंबड्या चोरी करण्यासाठी वापरलेली जीजे १६ झेड ८९८२ हे चारचाकी वाहन ताब्यात घेण्यात आले़ पथकांनी गुन्ह्यात सक्रीय असलेले जावेद शहा आरीफ शहा, मोहिनोद्दीन सलाउद्दीन काझी, संतोष मंगल ठाकरे व अन्वर अल हक शेख समीर सर्व नंदुरबार यांना ३० डिसेंबर रोजी ताब्यात घेतले़ चौघांकडून अहमदाबाद येथे व्यापाºयाला कोंबड्या विक्री करुन घेतलेले १ लाख ८३ हजार ५०० रुपये व ५ लाख रुपयांचे वाहन असा सात लाख १६ हजार ६०० रुपयांचा मुद्देमालही जप्त करण्यात आला़

ज्ञानदीप सोसायटीतून ताब्यात घेतलेल्या अमित यादव याचे दोन्ही साथीदार फरार होण्यात यशस्वी झाले आहेत़ तिघेही मध्यप्रदेशातील इंदौर येथे एकत्र येऊन महाराष्ट्र, गोवा येथे चोऱ्या करण्यासाठी येतात़ त्यांनी औरंगाबाद येथून चारचाकी चोरी करुन ते नंदुरबारात आले होते़ तिघेही तीन वेगवेगळ्या मार्गांवर बंद घर पाहून चाचपणी करत होते़ याच दरम्यान अमित यादव हा पथकांच्या हाती आला़ ही माहिती इतर दोघांना मिळाल्याने ते फरार झाल्याचा अंदाज आहे़ दरम्यान दोघेही जिल्ह्यात असावेत असा अंदाज असल्याने त्यांचा शोध सुरु आहे़