तर रोहित पवार यांचीही चौकशी करा-विजय चौधरी

नंदुरबार : सत्ताधारी लोकप्रतिनिधींसह पालकमंत्री कोरोना रुग्णांना रेडमेसिविर पुरविण्यात कमी पडल्यानेच भाजपचे नेते व माजी आमदार शिरीष चौधरी यांना गरजूंना रेमडेसिविर उपलब्ध करून द्यावे लागले. जर शिरीष चौधरी यांची चौकशी होणार असेल तर आमदार रोहित पवार यांचीही चौकशी झाली पाहिजे, त्यांनीही रेमडेसिविर वाटप केल्याचे भाजपचे जिल्हाध्यक्ष विजय चौधरी यांनी बुधवारी पत्रकार परिषदेत सांगितले.

हिरा ग्रुपच्या नंदुरबारातील हॅाटेलमध्ये रेमडेसिविरचा साठा असल्याचा आरोप मंत्री नवाब मलिक यांनी केला होता. त्याबाबत विजय चौधरी यांनी पत्रकार परिषद घेऊन सांगितले, कोरोनाने रुग्ण बेजार होत होते, अनेकांना रेमडेसिविर मिळत नव्हते. सत्ताधारी लोकप्रतिनिधी उदासीन होते, पालकमंत्री मुंबईत बसून होते अशा वेळी भाजपतर्फे ते उपलब्ध करून देण्यात आले. शिरीष चौधरी यांनी त्यांच्या लायसनच्या माध्यमातून ते अत्यल्प दरात गरजूंना उपलब्ध करून दिले. असे असताना विरोधकांच्या खोट्या माहितीच्या आधारे मंत्री मलिक यांनी आरोप केला. राष्ट्रवादीचे आमदार रोहित पवार यांनी देखील हजारो रेमडेसिविर त्यांच्या मतदारसंघात वाटप केले. मग त्यांचीही चौकशी करा असेही विजय चौधरी यांनी आवाहन केले.