सातपुड्यात यंदा सर्व होळ्या पेटणार

नंदुरबार : जिल्ह्यात यंदाही पारंपरिक होलिकोत्सव होणार आहे. या पार्श्वभूमीवर सातपुड्यातील धडगाव व अक्कलकुवा तालुक्यातील सर्व मानाच्या व गावोगावच्या होळ्या पेटणार आहेत. हा उत्सव यंदा कोविड नियमांनुसार साजरा होणार असून यासाठी दुर्गम भागात जनजागृती करण्यात येणार आहे.

सातपुड्यातील होलिकोत्सवाच्या पार्श्वभूमीवर सोमवारी समाजकल्याण सभापती रतन पाडवी यांच्या मार्गदर्शनात जमाना ता. अक्कलकुवा येथे या संदर्भात बैठक घेण्यात येणार असल्याची माहिती देण्यात आली आहे. या बैठकीत धडगाव व अक्कलकुवा तालुक्यातील मानाच्या होळ्या तसेच गावांचे कारभारी, पोलीस पाटील, सरपंच, उपसरपंच हे उपस्थित राहणार आहेत. यावेळी जनजागृतीपर विषयांवर चर्चा करण्यात येऊन होलिकोत्सवाचे वेळापत्रक ठरवण्यात येणार असल्याचे समजते. दरम्यान, काठी येथील राजवाडी होळी यंदा कोविड नियमांचे पालन करुन होणार आहे. त्यादृष्टीने तयारीला वेग देण्यात आला आहे. दुसरीकडे सातपुड्यातील इतर मानाच्या होळ्या होणार असल्याने आदिवासी बांधवांमध्ये उत्साह संचारला आहे. दुर्गम भागात यंदा होणारा होलिकोत्सव हा जनजागृतीपर असणार असल्याचे सांगण्यात आले आहे. प्रामुख्याने कोरोनापासून सर्वांनी स्वत:चा बचाव कसा करावा, मास्कचा वापर याबाबत माहिती वेळोवेळी देण्यात येणार आहे. कोरोनामुक्त असा हा उत्सव साजरा करण्यासाठी त्या-त्या गावात उपाययोजना करण्याबाबतही चर्चा सुरू असल्याचे सांगण्यात आले आहे. दरम्यान, सोमवारी होणाऱ्या बैठकीत काय सूचना दिल्या जातात याकडे दोन्ही तालुक्यांचे लक्ष लागून राहणार आहे.