आमपाडा येथे कृषी दिन साजरा

तालुका कृषी अधिकारी बापू गावीत, पशुधन विकास अधिकारी डॉ. एस. बी. पाटील, पंचायत समितीचे कृषी अधिकारी शिरीष कोकणी, बळीराजा कृषक मंडळ धनराटचे अध्यक्ष विशाल गावीत, आमपाडा येथील शेतकरी गुलाब गावीत, कृषी विभागाचे क्षेत्रीय अधिकारी, तालुका पातळीवर पीक स्पर्धेत विजेते ठरलेले शेतकरी प्रमुख अतिथी म्हणून उपस्थित होते.

तहसीलदार मंदार कुलकर्णी यांच्या हस्ते वृक्षारोपण व वसंतराव नाईक यांच्या प्रतिमेचे पूजन करून कार्यक्रमाची सुरुवात करण्यात आली. रब्बी हंगाम २०२० मध्ये पीक स्पर्धेत भाग घेऊन विजेते ठरलेल्या शेतकऱ्यांना मान्यवरांच्या हस्ते प्रशस्तीपत्र देऊन गौरविण्यात आले. प्रास्ताविकात तालुका कृषी अधिकारी बापू गावीत यांनी कार्यक्रमाचा हेतू कथन करुन कृषी विभागाच्या योजनांची माहिती दिली व विविध योजनांचा लाभ घ्यावा, असे आवाहन त्यांनी केले. डॉ. मुरलीधर महाजन यांनी शेतीत आधुनिक तंत्रज्ञानाची जोड देऊन जास्तीत जास्त उत्पादन कसे घेता येईल याविषयी माहिती दिली. डॉ. श्रीधर देसले यांनी सेंद्रिय कर्बाचा आपल्या शेतीत वापर वाढवून शेतजमिनीचे आरोग्य ठेवणे शक्य असल्याचे सांगून कांदा पिकाच्या उत्पन्नवाढीवर त्यांनी मार्गदर्शन केले. विशाल गावीत यांनी नवापूरच्या भौगोलिक मानांकन प्राप्त सुगंधी तूर पासून तूरडाळ उत्पादन व प्रक्रियेकरिता सदस्य नोंदणी, भविष्यात तूरडाळची मागणी व पुरवठा या विषयावर स्थानिक बोलीभाषेतून मार्गदर्शन केले. तहसीलदार मंदार कुलकर्णी यांनी कृषी दिनाच्या शुभेच्छा देऊन शेतकऱ्यांच्या सर्वंकष उन्नतीसाठी कृषी व महसूल विभाग समन्वय राखून प्रयत्नशील असल्याचे सांगितले. कृषी पर्यवेक्षक दिलीप गावीत यांनी आभार मानले. आमपाडा परिसरातील शेतकरी कार्यक्रमास उपस्थित होते.