शहादा तालुक्यात जिल्हा परिषद पोटनिवडणुकीची प्रशासकीय तयारी पूर्ण

येथील तहसील कार्यालयाच्या सभागृहात तहसीलदार डॉ. मिलिंद कुलकर्णी यांनी निवडणूक आयोगाच्या मार्गदर्शक सूचनांनुसार होऊ घातलेल्या निवडणुकीविषयी माहिती दिली. त्यानुसार इच्छुक उमेदवारांना प्रथम ऑनलाइन अर्ज सादर करावा लागणार आहे. या पोटनिवडणुकीत विविध राजकीय पक्षांनी प्रचारादरम्यान आधुनिक साधनांचा वापर करावा, गर्दी टाळण्याचा प्रयत्न करावा, यासोबतच विविध बाबींच्या परवानगीसाठी तहसील कार्यालयात एक खिडकी योजना कार्यान्वित करण्यात आली असून, त्या ठिकाणी विविध परवानग्या मिळतील. विनाविलंब परवानगी मिळावी, यासाठी प्रयत्न आहे. त्याचबरोबर आचारसंहिता पथकांचीही नियुक्ती करण्यात आली आहे.

तालुक्यात १८६ केंद्र

या पोटनिवडणुकीत चार गट व आठ गणात एकूण एक लाख १७ हजार ४०७ मतदार असून, १८६ मतदान केंद्रे आहेत. कोरोनामुळे मतदान केंद्रावर मतदार संख्या प्रत्येकी ८०० एवढी मर्यादित करण्यात आली आहे. यापूर्वी एका केंद्रावर १ हजार २०० मतदार एका केंद्रावर मतदान करत होते. परंतु कोरोनामुळे सोशल डिस्टन्सिंग व गर्दी टाळण्यासाठी मतदान केंद्रावरील मतदारांची संख्या मर्यादित करण्यात आली आहे. प्रत्येक मतदान केंद्रावर सहा कर्मचारी याप्रमाणे १८६ केंद्रांवर एकूण ९३० कर्मचाऱ्यांची नियुक्ती करण्यात आली आहे. त्याचप्रमाणे १८६ मतदान यंत्र कार्यान्वित राहणार आहेत. दरम्यान, ८ जुलैला मतदान अधिकारी व कर्मचाऱ्यांचा पहिला प्रशिक्षण वर्ग येथील चावरा इंग्लिश स्कूलला आयोजित करण्यात येणार आहे.

निवडणूक कार्यक्रम असा

न्यायालयाच्या निर्णयानुसार निवडणूक आयोगाने निवडणूक कार्यक्रम घोषित केला आहे. त्यानुसार २९ जून ते ५ जुलैपर्यंत सुटी सोडून सकाळी ११ ते दुपारी तीन या वेळेत नामनिर्देशन पत्र स्वीकारण्यात येणार आहेत. ६ जुलैला छाननी, त्याचदिवशी छाननीनंतर लगेच वैध उमेदवारांची यादी गट व गणनिहाय प्रसिद्ध होणार आहे. अपील दाखल करण्याची शेवटची तारीख ९ जुलै असून, १२ जुलैला अपिलावर सुनावणी आहे. अपील नाही तेथे १२ जुलैपर्यंत माघार व अपील आहे त्याठिकाणी १४ जुलैपर्यंत माघारीची सकाळी ११ ते दुपारी तीनपर्यंत मुदत असणार आहे. जेथे अपील नाही त्या ठिकाणी १२ जुलैला साडेतीन वाजल्यानंतर निवडणूक लढविणार्‍या उमेदवारांची यादी प्रसिद्ध करून निशाणी वाटप होणार आहे. ज्या ठिकाणी अपील आहे त्या ठिकाणी १४ जुलैला निशाणी वाटप होणार आहे. १९ जुलैला सकाळी साडेसात ते सायंकाळी साडेपाच या वेळेत मतदानाची प्रक्रिया होईल. २० जुलैला मतमोजणी होणार आहे.