खापर येथे प्रती सिलिंडरला २८ रुपयांची जास्तीची आकारणी

अक्कलकुवा तालुक्यात गॅस एजन्सी ग्राहकांना सिलिंडर सेवा देत असून सध्या गॅसचे प्रती सिलिंडर दर ७८२ रुपये घरपोच असताना खापर गावात सिलिंडर धारकांकडून ८१० रुपये दराप्रमाणे आकारणी केली जात आहे. या प्रकाराविषयी संबंधितांना विचारणा केली असता, घरपोच सिलिंडर पोहोचविण्यासाठी जादा आकारणी करीत असल्याचे सांगण्यात आले. मात्र, गॅस खरेदी पावतीवर ७८२ रुपयांची नोंद केली जात असताना अतिरिक्त वसुली करण्यात येत आहे.

खापर गावासह परिसरातील दररोज शेकडो सिलिंडर वितरित करण्यात येत असून त्यातील बहुतेक सिलिंडर जवळील गुजरात राज्यात विक्री केली जात आहे. या विक्रीतून सिलिंडर विक्रेत्याला प्रती सिलिंडर जादा पैसे मिळत असल्याचे ग्राहकांकडून बोलले जात आहे.

खापर परिसरातील अनेक गावे गुजरात राज्य सीमेलगत असून त्यांना डेडीयापाडा येथून सिलिंडर ने-आण करणे गैरसोयीचे ठरत असल्याने बहुतेक ग्राहक घरपोच सिलिंडर घेताना दिसून येत आहेत.

सदर एजन्सी चालक सिलिंडरचे वजन करून देत नसून, सिलिंडरची पोहोच पावतीही देत नसल्याचे ग्राहकांना आढळून आले आहे. त्यामुळे यातील गौडबंगाल कळत नसल्याचे ग्राहकांकडून सांगण्यात येत आहे. अनेक ग्राहक ऑनलाइन पेमेंटचा वापर करीत असताना सदर कर्मचारी ऑनलाइन पेमेंट स्वीकारत नसून रोखीनेच पेमेंटचा आग्रह करण्यात येत असल्याने वाद उद्भवत आहेत. सध्या गोडाऊन डिलिव्हरीचे भाव काय आहेत हे ग्राहकांना कळविणे आवश्यक असून एजन्सी चालकांकडून माहिती फलक लावण्यात आला नसून ग्राहकाकडून माहिती फलकांची मागणी करण्यात येत आहे.

तालुक्यातील पुरवठा विभागाकडून या बाबीकडे दुर्लक्ष करण्यात येत असून जीवनावश्यक वस्तूंचे वितरण सामान्य जनतेसाठी असताना तालुक्यातील बहुसंख्य हॉटेलमध्ये घरगुती सिलिंडर सर्रास वापरले जात आहेत. या अवैध वापरावर कार्यवाही होतांना दिसून येत नाही. तसेच खासगी वाहनांमध्ये गॅसचा खुलेआम वापर करण्यात येत आहे. एजन्सी धारकाकडून अवैध व्यवसायाला पाठबळ मिळत असून पुरवठा खात्याने लक्ष देण्याची मागणी केली जात आहे.

जिल्हाभरात घरपोहोच सिलिंडरचे दर एकसारखे असताना अक्कलकुवा तालुक्यातील खापर येथे २८ रुपये जास्तीचा दर आकारला जात आहेत. याची पुरवठा खात्याने चौकशी करावी व घरपोहोच सिलिंडर कार्डावर नोंदविण्यात आलेल्या दरात देण्यात यावेत यावेत अशी मागणी खापर येथील त्रस्त गॅसधारकाकडून करण्यात येत आहे. जिल्हा पुरवठा शाखेने याची दखल घेऊन जनतेला दिलासा देण्याची मागणी होत आहे.