प्रकाशा येथे विना मास्क फिरणाऱ्यांकडून ८० हजार दंड वसूल

प्रकाशा येथील बाजारपेठेत परिसरातील गावातील नागरिक बाजारासाठी येतात. या गर्दीत कोरोनाचे नियम न पाळणाऱ्या नागरिकांवर प्रकाशा पोलीस दूरक्षेत्राचे कर्मचारी गेल्या चार महिन्यांपासून कारवाई करत आहेत. त्यात ४०० जणांवर दंडात्मक कारवाई करण्यात येऊन त्यांच्याकडून सुमारे ८० हजार रुपये दंड वसूल करण्यात आला. शहादा पोलीस स्टेशनचे निरीक्षक दीपक बुधवंत यांच्या मार्गदर्शनाखाली प्रकाशा येथील हवालदार सुनील पाडवी, रामा वळवी, विकास शिरसाठ, अजित नागलोद आदींनी ही कारवाई केली.

दरम्यान, प्रकाशा गाव एक महिन्यापासून कोरोनामुक्त होते. मात्र, २६ मे रोजी पुन्हा रुग्ण आढळून आल्याने ग्रामपंचायत, महसूल व पोलीस विभागाने कोरोना संसर्ग रोखण्यासाठी उपाययोजना सुरू केल्या आहेत. गावात चौकाचौकांत बसणाऱ्यांना पोलिसांकडून समज देण्यात येत आहे. शनिवारी सर्वोदय विद्यालयाच्या मैदानावर गावातील काही तरुण क्रिकेट खेळत होते. क्रिकेटचा खेळ पाहण्यासाठी गर्दी जमली होती. पोलिसांनी त्यांना समजावण्याचा प्रयत्न केला. मात्र, काही तरुण पळून गेल्यांच्या त्यांच्या आठ ते दहा मोटारसायकली जप्त केल्या होत्या. मोटारसायकली घेण्यासाठी हे तरुण आले असता त्यांना उठबशा घालण्याची शिक्षा देऊन त्यांच्या पालकांना बोलावून समज देण्यात आली.