जिल्ह्याबाहेरील ३४३ रुग्ण घेताहेत जिल्ह्यातील शासकीय व खासगी रुग्णालयांमध्ये उपचार

नंदुरबार : जिल्ह्यातील शासकीय व खासगी रुग्णालयांमध्ये परजिल्ह्यातील कोरोना रुग्ण उपचारासाठी धाव घेत आहेत. सद्यस्थितीत ३४३ रुग्ण उपचार घेत आहेत. ऑक्सिजनच्या उपलब्धतेमुळे रुग्ण नंदुरबारच्या रुग्णालयांमध्ये उपचारासाठी दाखल होत आहेत. यामुळे मात्र रुग्णालयांवर ताण पडू लागला आहे.

जिल्ह्यात आधीच कोरोना रुग्णालये आणि बेडची संख्या मर्यादित आहे. त्यातच आता जिल्ह्याबाहेरील रुग्णांचा ताण वाढू लागला आहे. जिल्ह्यातील रुग्णालयांसाठी असलेल्या ऑक्सिजनची उपलब्धता पाहता ऑक्सिजन बेडसाठी रुग्ण येत आहेत. त्यात जिल्ह्याशेजारील गुजरात व मध्यप्रदेशातील गावे आणि धुळे, नंदुरबार, जळगाव व नगर जिल्ह्यातील रुग्णांचाही समावेश आहे. जिल्हा रुग्णालयात पाच, शहादा, नवापूर व तळोदा शासकीय रुग्णालयात ४० पेक्षा अधिक रुग्ण आहेत तर खासगी रुग्णालयात जवळपास ३०० रुग्ण आहेत. नंदुरबारातील स्मित हॅास्पिटलमध्ये १२, निम्समध्ये १० पेक्षा अधिक रुग्णांसह शहादा, चिंचपाडा, नवापूर येथील रुग्णालयांमधील जिल्ह्याबाहेरील रुग्णांचा समावेश आहे.

जिल्हास्तरीय आढावा बैठकीतही जिल्हाधिकारी यांनी या विषयावर लक्ष केंद्रित केल्याचे सूत्रांनी सांगितले.