नवापूर तालुक्यात सांगाळी येथे १०० टक्के लसीकरण

खांडबारा : नवापूर तालुक्यातील सागाळी येथील कोविड प्रतिबंधक लसीकरणात ३३१ नागरिकांचे पूर्ण लसीकरण होऊन १०० टक्के लसीकरण झाले. लसीकरणात सागाळी हे गाव नवापूर तालुक्यातील प्रथम गाव ठरले आहे.

सागाळी जिल्हा परिषद शाळेत १४ मे रोजी घेण्यात आलेल्या शिबिरात प्रथम १३३ नागरिकांचे लसीकरण करण्यात आले होते. त्यानंतर उर्वरित ४५ वर्षे व त्यावरील १९८ नागरिकांचे लसीकरण करण्यासाठी पंचायत समिती सदस्य छगन महाले, सरपंच संजय कोकणी, उपसरपंच संगीता कोकणी, ग्रामसेवक दौलत कोकणी, केंद्रप्रमुख सुनीता अमृतसागर, शिक्षक दिनेश पाडवी, सोनल नेरकर ,आशा वर्कर, अंगणवाडी सेविका यांनी जनजागृती करून त्या सर्वांना नजीकच्या नवापाडा, निंबोणी व नगारे येथील लसीकरण शिबिरात घेऊन जाऊन लसीकरण करून १०० टक्के नागरिकांचे लसीकरण करून घेतले असून, तालुक्यात सागाळी या ग्रामपंचायतीने प्रथम क्रमांक पटकावला आहे.

यासाठी तालुका ग्रामसेवक संघटनेचे अध्यक्ष दौलत कोकणी यांनी आदर्श निर्माण करून तालुक्यातील सर्व गावे १०० टक्के लसीकरण करण्यासाठी सर्व ग्रामसेवकांना सहकार्य करणार असल्याची माहिती ‘लोकमत’ शी बोलताना दिली.

या ग्रामपंचायतीचे सरपंच संजय कोकणी, ग्रामसेवक दौलत कोकणी, उपसरपंच संगीता कोकणी, पंचायत समिती सदस्य छगन महाले यांचे तहसीलदार मंदार कुलकर्णी, गटविकास अधिकारी चंद्रकांत माळी यांनी कौतुक केले. तालुक्यातील इतर गावांनी ही कामगिरीसाठी प्रयत्न करावेत असे आवाहन केले.