दीड लाखाची लाच घेताना ग्रामविकास अधिकारी रंगेहाथ पकडला

प्लॉट ग्राम पंचायच्या नमुना नं़ ८ वर नावे करण्यासाठी मागितली लाच

ठळक मुद्देग्रामविकास अधिकाऱ्याच्या राहत्या घराच्या परिसरात सापळा रचण्यात आला़

नांदेड : गावठाणमधील असलेला प्लॉट ग्राम पंचायच्या नमुना नं़ ८ वर नावे करण्यासाठी दीड लाख रुपयांची लाच घेणाऱ्या नांदेड तालुक्यातील रहाटीच्या ग्राम विकास अधिकारी हनमंत मष्णाजी वाडेकर याला रंगेहात पकडण्यात आले आहे़ त्याच्यासह अन्य एका विरुद्ध गुन्हा दाखल करण्याची प्रक्रिया सुरु आहे़

नांदेड तालुक्यातील राहटी येथे तक्रारदाराच्या राहत्या घराच्या बाजुला गावठाणचा प्लॉट आहे़ तो प्लॉट तक्रारदाराच्या ताब्यात ५० वर्षापासून आहे़ हा प्लॉट तक्रारदारच्या नावे ग्रामपंचायतीच्या नमुना नं़८ वर करण्यासाठी ग्रामविकास अधिकारी हनमंत वाडेकर याने दीड लाख रुपये लाच मागितली़ या प्रकरणी तक्रारदाराने लाच लुचपत प्रतिबंधक विभागाकडे तक्रार केली़

या तक्रारीवरुन ८ सप्टेंबर रोजी ग्रामविकास अधिकारी वाडेकर यांच्या राहत्या घराच्या परिसरात सापळा रचण्यात आला़ वाडेकर याने लाचेचे दीड लाख रुपये खाजगी इसम बालाजी मरीबा वाघमारे यांच्यामार्फत स्वीकारले या प्रकरणी विमानतळ ठाण्यात ग्रामविकास अधिकारी वाडेकर याच्यासह बालाजी वाघमारे विरुद्ध विमानतळ पोलिस ठाण्यात गुन्हा दाखल करण्यात येत आहे़

ही कारवाई पोलीस अधीक्षक कल्पना बारवकर, अप्पर पोलीस अधीक्षक अर्चना पाटील, पोलीस उपअधीक्षक विजय डोंगरे यांच्या मार्गदर्शनाखाली पोलीस निरीक्षक राजेश पुरी, कपील शेळके, पो़ना़ एकनाथ गंगातीर्थ, दर्शन यादव, नरेंद्र बोडके, आशा गायकवाड यांनी केली़