भोकर/मातूळ (जि.नांदेड) : येथील म्हैसा रस्त्यावरील पिंपळढवजवळील वळणावर दोन दुचाकींची समोरासमोर धडक होऊन झालेल्या भीषण अपघातात चार जण ठार, तर एक गंभीर जखमी झाला. ही घटना मंगळवारी सायंकाळी साडेसहा वाजण्याच्या सुमारास घडली. मृतातील दोघे मातुळ येथील आश्रमशाळेचे कर्मचारी होते.
भोकर ते म्हैसा राष्ट्रीय महामार्गावरील पिंपळढव शिवारातील वळणावर दुचाकी (क्र.एमएच २६ सीके ६६५९) व दुचाकी (क्र.एमएच २६ सीएफ ९६१८) यांची समोरासमोर धडक झाली. या अपघातात दुचाकीस्वार गंगाधर विश्वनाथ म्हैसुरे (वय ५५, रा.शिळवणी, ता.देगलूर. ह.मु. भोकर), तर परसराम किशन डाकोरे (वय ५०, रा.पांडुरणा, ता.भोकर) व दुसऱ्या दुचाकीवरील ज्ञानेश्वर गणेश मानेबोईनवाड (वय २५, रा.नांदा बु.), विनायक बुरोड (२५, रा.नांदा बु.) या चाैघांचा मृत्यू झाला. श्रावण हनुमंत पेडेमोडे (वय २३, रा.कुंभरगाव, ता.बिलोली) हे गंभीर जखमी झाले. त्यांच्यावर भोकर येथील ग्रामीण रुग्णालयात उपचार करून पुढील उपचारासाठी नांदेडला रवाना करण्यात आले. म्हैसुरे व डाकोरे हे दोघे कै.व्यंकटराव देशमुख निवासी आश्रमशाळा मातुळ येथे मदतनीस व कामाठीपदावर कार्यरत होते. अपघाताची माहिती कळताच, ग्रामीण रुग्णालयात मृताच्या नातेवाइकांनी गर्दी केली होती.