स्वारातीम विद्यापीठाची अधिसभा बैठक ऑफलाईन- ऑनलाईनच्या वादात

स्वारातीम विद्यापीठाच्या अधिसभा बैठक ४ डिसेंबर रोजी होणार असल्याचे पत्र अधिसभा सदस्यांना देण्यात आले होते. परंतु २ डिसेंबर रोजी अधिसभा ऑनलाईन घेण्याचे कळविले आहे. विद्यापीठातील विविध प्रश्नांवर वादळी चर्चा होईल या भितीने कोविड १९ चे कारण देत ही बैठक ऑनलाईन घेण्यात येत असल्याचा आरोप सिनेट सदस्य प्रा. सुरज दामरे यांनी केला आहे. यासंदर्भात प्रा. दामरे यांनी राज्यपालांना पत्र पाठविले असून त्यामध्ये विद्यापीठ प्रशासनाने अनेक कामात गैरकारभार केल्याचे स्पष्ट केले आहे. विद्यापीठाची अधिसभा ज्या सभागृहात घेतली जाते, त्याची आसनक्षमता मोठी आहे. सामाजिक अंतर ठेवून ही बैठक घेता येते. विद्यापीठाच्या पदवी, पदव्युत्तर परीक्षा ही महाविद्यालयास्तरावर ऑफलाईन घेतल्या जात आहेत. अशा वेळी अधिसभा बैठक ऑनलाईन का घेतली जात आहे. अधिसभा बैेठकीत विद्यापीठाने आचारसंहिता काळात केलेली पदभरती, शासनाच्या विविध नियमांचे लॅब उभारणीत उल्लंघन, विद्यापीठातील बंधारा बांधणीत तांत्रिक मान्यता न घेता ई टेंडर काढणे, परीक्षेमधील चुकीच्या उत्तरसूची वापरणे, आदी विषयावर चर्चा होणार होती. त्यामुळेच विद्यापीठाने ही बैठक ऑनलाईन घेण्याचा निर्णय घेतल्याचा आरोप करण्यात आला आहे.