लाखोंच्या मालमत्तेच्या सुरक्षेची जबाबदारी ६० रुपयांच्या कुलपावर

घराकरिता लाखो रुपये मोजणारी मंडळी कुलूप खरेदी करताना स्वस्तातील कुलूप कोणते आहे, याचाच शोध घेतात. यामुळे चोरट्यांना कुलूप तोडताना फारसा वेळ लागत नाही. यवतमाळातील कुलूप विक्रेत्यांच्या काही दुकानांत यासंदर्भातील माहिती घेतली असता धक्कादायक माहिती पुढे आली आहे. बाजारपेठेत साधे कुलूप सर्वाधिक लोकप्रिय आहे. सर्वसाधारण ग्राहक ५० ते १०० रुपये किमतीचे कुलूप खरेदी करतात. बाजारात कुलपाची किंमत २० रुपयांपासून ते ३००० रुपयांपर्यंत आहे. यामध्ये विविध कंपन्यांचा समावेश आहे. त्यात काही कंपन्यांचे ठरावीक आकाराचे आणि ठरावीक पॅटर्नचे लाॅकही बाजारात आहेत. परंतु, महागड्या कुलपाकडे घरमालक चुकूनही पाहत नाहीत. मोर्टिस लाॅक आणि राऊंड पॅडलाॅक याकडे खरेदी करणारे ग्राहक फारसे नसतातच. या कुलपांच्या किमती ग्राहकांच्या आवाक्याबाहेर आहेत. यामुळे विक्रेतेही असे कुलूप मोठ्या प्रमाणात विक्रीसाठी ठेवत नाहीत. यामुळे लाखो रुपये किमतीचे घर तकलादू कुलपांमुळे असुरक्षित झाले आहे. ग्राहक कुलूप आणि दार याबाबत अनभिज्ञ असल्याचेच पुढे आले आहे.

जिल्ह्यात मागील वर्षभरात २४९ घरफोड्या झाल्या आहेत. या घरफोड्यांत चोरट्यांनी सबल आणि इतर तांत्रिक साहित्यांचा वापर केला आहे. बहुतांश घरांना साधे कुलूप आणि स्वस्त दरातले कुलूप पाहायला मिळाले. यामुळे आतातरी नागरिकांनी सावध होण्याची गरज आहे.

वर्षभरात जिल्ह्यात झाल्या २४९ घरफोड्या

मागील वर्षभरात नांदेड जिल्ह्यात जवळपास २४९ घरफोड्या झाल्याची नोंद पोलीस दरबारी आहे. त्यात काही चोऱ्यांची नोंद जाणीपूर्वक टाळली जाते. त्यामुळे निश्चितच हा आकडा मोठा असणार आहे. अनेकजण घरफोडीनंतरही तक्रार करण्यास धजावत नाहीत. परंतु, बहुतांश घरफोड्या या कडीकोंडा आणि कुलूप तोडून होतात. त्यामुळे नागरिकांनी घराच्या मुख्य प्रवेशद्वाराचा कडीकोंडा आणि कुलूप चांगल्याच दर्जाचे वापरणे गरजेचे आहे.