भोकर : येथील म्हैसा बायपासवरील सुभेदार रामजी आंबेडकर चौक (उमरीरोड) या ठिकाणी हायवाने दुचाकीला दिलेल्या धडकेत दुचाकी वरील दोघे ठार झाल्याची घटना शुक्रवारी सायंकाळी सहा वाजताच्या सुमारास घडली आहे.
यातील मयत पलंबर असलेले हरीदास बालाजी साडेवार ( वय २८, रा. शास्त्रीनगर, भोकर ) आणि इलेक्ट्रेशियन मजुरदार राहुल दत्ता वाघमारे (वय ३४, रा. बसस्थानक समोर भोकर) हे दोघे दुचाकी (क्र. एम एच २६ सीजे ५४९३) वरुन उमरीकडे जात होते. दरम्यान उमरीकडून डस्ट घेऊन येणाऱ्या हायवा (क्र. एम एच २६ बीई ९९०७) च्या चालकाने आपल्या ताब्यातील वाहन हयगयीने चालवून समोरुन येणाऱ्या दुचाकीस धडक दिली.
यात राहुल वाघमारे यांचा हायवा समोरील चाकाखाली येऊन जागीच मृत्यू झाला तर, गंभीर जखमी हरीदास साडेवार हे दुचाकीसह फरफटत जाऊन गंभीर जखमी झाले होते. गंभीर जखमीस ग्रामीण रुग्णालयात दाखल केले असता येथील डाॅक्टरांनी मयत घोषित केले. घटनास्थळी मोठी गर्दी जमली होती. तर ग्रामीण रुग्णालयात मयताच्या नातेवाईकांनी एकच टाहो फोडला होता. घटनेची माहिती मिळताच पोलिस घटनास्थळी दाखल झाले होते.