भोकर : शहरातील बायपासवरील उमरी रस्त्यावर एका ट्रकच्या धडकेत दुचाकीस्वार जागीच ठार झाल्याची घटना आज सायंकाळी पाच वाजेच्या सुमारास घडली. गुजराल बालाजी सूर्यवंशी असे मृताचे नाव आहे.
शहरातील देवकृपा काॅटन केंद्रावर गुजराल बालाजी सूर्यवंशी (वय ३३ रा. पोमनाळा ता. भोकर) कामगार होते. आज सायंकाळी ते दुचाकीवरून (क्र. एम एच २६ बी झेड ०५८०) जात होते. दरम्यान बायपासवरील उमरी रस्त्यावरील चौकात पाठीमागून आलेल्या सिमेंट वाहतूक करणाऱ्या ट्रकने (क्र. एम एच २६ एच ४१११) त्यांच्या दुचाकीला जबर धडक दिली. यात दुचाकीस्वार सूर्यवंशीचा ट्रकझाली चिरडून जागीच मृत्यू झाला.
हा अपघात एवढा भीषण होता की, घटनास्थळी रक्तमांसाचा सडा पडला होता. धडक दिल्यानंतर ट्रकसह चालक पळून जाण्याच्या प्रयत्नात होता. मात्र, काही नागरिकांनी पाठलाग करुन ट्रक अडवत चालक शिवाजी लक्ष्मण राठोड ( रा. किवळावडगाव तांडा) यास पडकून पोलिसांच्या ताब्यात दिले. मृत गुजराल हा शिवसेनेचा तालुका सोशल मीडिया प्रमुख होता. त्याच्या पश्चात आई, वडील, भाऊ, पत्नी, २ मुले असा परिवार आहे.