नागपूर : दक्षिण नागपुरातील काही वस्त्यांमध्ये ९ जूनपासून पाणी पुरवठा विस्कळीत झाला आहे. तर म्हाळगीनगर भागातील अतिशय कमी दाबाने पाणी पुरवठा होत आहे. म्हाळगीनगर जलकुंभावरून पाणी पुरवठा होणाऱ्या विनायकनगर, महालक्ष्मीनगर, गजानननगर भागातील रहिवाशी नळाच्या पाण्यावर अवलंबून आहे. या भागात विहीर बोअरवेल नसल्याने पाण्यासाठी लोकांना त्रास सहन करावा लागतोय.
बुधवारी देखील म्हाळगीनगर जलकुंभावरून पाणी सोडण्यात आले नाही. त्यामुळे लोकांनी अधिकाऱ्यांना टँकरने तरी पाणी पाठवा अशी विनंती केली. मात्र अधिकाऱ्यांनी प्रतिसाद न दिल्याने शिवसेनाचे संघटक विशाल कोरके हे जलकुंभावर चढून पाण्यासाठी आंदोलन केले. या आंदोलनानंतर अधिकाऱ्यांनी म्हाळगीनगर न्यू म्हाळगीनगर, महालक्ष्मीनगर, प्रोसेस कॉलनी, विनायक सोसायटी, प्रेरणानगर या भागात टँकरने पाणी पुरवठा केला. या आंदोलनात नीलिमा शास्त्री, उज्वला उंबरे, धम्मा सोनटक्के, शैलेश काशीकर, अक्षय अनकर, किशोर रंदई, उज्जवला उमरे, नलिनी सदावर्ती ,मनिषा नागमोते, सोनाली उमरे, रंजना राऊत, अर्चना बैस, रंजिता भामरे, रामदास उमरे, नरेंद्र उदापुरे, विजय सूर्यवंशी आदी उपस्थित होते.