खड्डे बुजविण्यासाठी तरुणाई आली धावून!

गुमगाव : नागपूर शहराच्या बाहेरून जाणाऱ्या जबलपूर-अमरावती या बाह्य वळण मार्गावर ठिकठिकाणी मोठेमोठे खड्डे पडले असल्याने, या रस्त्याची दुरावस्था झाली आहे. संबंधितांकडे वारंवार तक्रार करूनही रस्ता दुरुस्ती केला जात नसल्याने गुमगाव-कोतेवाडा-वागदरा येथील तरुणांनी अखेर लोकवर्गणी जमा करून ठिकठिकाणी पडलेले खड्डे बुजविण्यासाठी पुढाकार घेतला.

या बाह्य वळण मार्गाचे काम गेल्या सात वर्षांपासून सुरू आहे. मध्ये मध्ये काही ठिकाणी रोडचे काम अपूर्ण आहे. परिणामी, येथे मोठे खड्डे पडले असून पावसाळा सुरू असल्याने खड्ड्यांमध्ये पाणी साचले असून वाहन चालकांना खड्ड्यांचा अंदाज येत नसल्याने अपघाताने प्रवाशांचे कमालीचे हाल होत आहेत. या रस्त्यावरून वाहन चालविताना खड्डे चुकविण्यासाठी वाहन चालकांना सतत तारेवरची कसरत करावी लागत आहे. मात्र पावसाळ्याचे तीन महिने उलटल्यानंतरही या रस्त्याची डागडुजी करण्यात आली नाही. परिणामी, मोठी दुर्घटना होण्याची दाट शक्यता वर्तविल्या जात असताना गुमगाव, कोतेवाडा, वागदरा येथील युवकांनी वर्गणी जमा करून मुरुम-गिट्टीचा वापर करून जेसीबी मशीनद्वारे तात्पुरते खड्डे बुजविण्यात आले आहेत. संबंधित विभागाने १५ दिवसात वेळीच दखल घेऊन तातडीने कायमची दुरुस्ती करावी अन्यथा चक्का जाम आंदोलन करण्याचा इशाराही तरुणांनी दिला आहे. सामाजिक कार्यकर्ते प्रमोद फुलकर, माजी सरपंच रवींद्र आष्टनकर, उपसरपंच अशोक फुलकर, अरविंद वाळके, उपसरपंच किशोर पडवे, चंद्रकांत झाडे, दामू दुर्गे, भारत चोपकर, मयूर फुलकर, गणेश पांडे, दीपक सोनकुसळे, आकाश बावणे, विजय गंधारे यांच्यासह अनेक युवकांनी खड्डे बुजविण्यासाठी पुढाकार घेतला आहे.