नागपूर : ११ वर्षीय निरागस बालक साहिल ऊर्फ यश नितीन बोरकर याच्या अपहरण व खून प्रकरणातील क्रूरकर्मा आरोपी संतोष अरविंद काळवे (३०) याची फाशीची शिक्षा मुंबई उच्च न्यायालयाच्या नागपूर खंडपीठाने बुधवारी विविध कायदेशीर बाबी लक्षात घेता रद्द केली व त्याला जन्मठेपेची सुधारित शिक्षा सुनावली. न्यायमूर्तीद्वय सुनील शुक्रे व गोविंद सानप यांनी हा निर्णय दिला.
आरोपी मूळचा दापोली (काळवे), ता. मालेगाव, जि. वाशीम येथील रहिवासी आहे. त्याने खंडणीसाठी हे कृत्य केले. तो खापरी येथे भाड्याच्या खोलीत राहून मिळेल त्या ठिकाणी मोलमजुरी करीत होता. परंतु, त्याने वस्तीतील लोकांना तो पोलीस असल्याचे सांगितले होते. पीडित बोरकर कुटुंबही खापरीतच राहते. आरोपीची बोरकर कुटुंबाशी व यशसोबत चांगली ओळख होती. त्याने याचाच गैरफायदा घेऊन यशचा विश्वासघात केला.
१० जून २०१३ रोजी यश घराजवळच्या परिसरात मित्रांसोबत खेळत होता. दरम्यान, आरोपी मोटरसायकलने तेथे गेला व त्याने यशला चिप्स व कोल्डड्रिंकचे आमिष दाखवून सोबत चलण्यास सांगितले. आरोपी ओळखीचा असल्यामुळे यश बेफिकिर होऊन त्याच्या मोटरसायकलवर बसला. त्यानंतर आरोपीने यशला मिहान उड्डाणपुलाच्या खाली नेले व तेथे त्याचा काँक्रिटच्या दगडाने ठेचून खून केला. सत्र न्यायालयाने २०१८ मध्ये आरोपीला फाशीची शिक्षा सुनावली होती. ही शिक्षा कायम करण्यासाठी हे प्रकरण उच्च न्यायालयासमक्ष सादर करण्यात आले होते, तसेच आरोपीने या शिक्षेविरुद्ध अपील दाखल केले होते. सरकारतर्फे ऍड. संजय डोईफोडे तर, आरोपीतर्फे ऍड. संतोष चांडे यांनी बाजू मांडली.