काँक्रिटच्या घरात पेटवायच्या का चुली?

श्याम नाडेकर

लोकमत न्यूज नेटवर्क

नरखेड : वाढत्या महागाईमुळे सामान्य माणसाचे जगणे कठीण हाेत चालले आहे. केंद्र शासनाने ऐन सणासुदीच्या काळात घरगुती वापराच्या गॅसच्या किमती प्रति सिलिंडर ५० रुपयांनी वाढविल्याने आधीच आर्थिक अडचणीत असलेल्या सामान्यांच्या खिशाला पुन्हा कात्री लागली आहे. त्यामुळे आता सिमेंट काँक्रिटच्या घरात आता चुली पेटवून स्वयंपाक करायचा काय, असा प्रश्नही गृहिणींनी उपस्थित केला आहे.

वर्षभरापासून दर महिन्याला घरगुती वापराच्या गॅसच्या किमती वाढत आहेत. याची सर्वाधिक झळ सामान्य माणसाला बसत आहे. ऑगस्टमध्ये गॅस सिलिंडरच्या किमती २५ रुपयांनी तर सप्टेंबरमध्ये ५० रुपयांनी वाढविण्यात आल्या आहेत. डिसेंबर २०२० मध्ये ६५४.५० रुपयात मिळणारे गॅस सिलिंडर सप्टेंबर २०२१ मध्ये ९४५ रुपयांना खरेदी करावे लागत असल्याची माहिती अनेक गृहिणींनी दिली.

अलीकडच्या काळात ग्रामीण भागातील बहुतेकांनी त्यांची घरे सिमेंट काँक्रिटनी बांधली आहेत. त्यात शासनाच्या घरकुल व इतर याेजनांतर्गत बांधण्यात आलेल्या सिमेंटच्या घरांनी भर टाकली आहे. या सिमेंटच्या घरांमध्ये चुली पेटवायच्या का, त्यासाठी लागणारे सरपण आणायचे कुठून, असा प्रश्नही संतप्त महिलांनी उपस्थित केला. मागील १० महिन्यात घरगुती गॅस सिलिंडरच्या किमतीमध्ये प्रति सिलिंडर २९०.५० रुपयांनी वाढ करण्यात आली आहे. घरगुती गॅस सिलिंडरसाठी ९४५ रुपये मोजावे लागत असल्याने ग्राहकांमध्ये संताप व्यक्त हाेत आहे.

...

दीड वर्षापासून सबसिडी बंदच

सामान्य ग्राहकांना केंद्र शासनाच्या वतीने प्रति सिलिंडर सबसिडी दिली जायची. ही सबसिडी दीड वर्षांपासून पूर्णपणे बंद करण्यात आली आहे, अशी माहिती ग्राहकांनी दिली. उज्ज्वला योजनेतील ग्राहकांना प्रति सिलिंडर ४३.९० रुपये सबसिडी दिली जात असल्याची माहिती जाणकार व्यक्तींनी दिली. त्यांना सिलिंडरच्या किमतीप्रमाणे ३२० रुपये अनुदान मिळायला पाहिजे, असेही त्यांनी सांगितले.

...

नऊ महिन्यात सातव्यांदा दरवाढ

१ जानेवारीपासून आजवर घरगुती वापराच्या सिलिंडरची तब्बल सातव्यांदा दरवाढ करण्यात आली आहे. सिलिंडरवरील सबसिडी बंद करण्यात आल्याने, ही दरवाढ सामान्यांचे आर्थिक कंबरडे माेडत आहे. ऑगस्टमध्ये व्यावसायिक वापराच्या सिलिंडरला काहीसा दिलासा मिळाला होता. मात्र, सप्टेंबरमध्ये प्रति सिलिंडर ७० रुपयांची वाढ करण्यात आल्याने हा दिलासा कुचकामी ठरला. व्यावसायिक सिलिंडरसाठी आता प्रति सिलिंडर १,८४६ रुपये मोजावे लागतात. मागील महिन्यात या सिलिंडरच्या किमती पाच रुपयांनी कमी करून या महिन्यात ७० रुपयांनी वाढविल्या आहेत.

...

घर सिमेंटचे असल्यामुळे सिलिंडरशिवाय पर्याय नाही. घरात चूल पेटवायला जागाच नाही. दर वाढले तरी गरज असल्याने ते खरेदी करावेच लागते. बाकी खर्चात केलेली काटकसर सिलिंडर दरवाढीच्या रूपाने काढून घेतली जात आहे. गृहिणींची बाजू घेऊन लढणारे आता मूग गिळून चूप बसले आहेत.

- सुवर्णा शेंडे, गृहिणी, नरखेड.

...

सिलिंडरचा वापर कमी करायचे तर चूल हा एकमेव पर्याय आहे. चुलीसाठी सरपण आणायचे कुठून, ही समस्या आहे. चुलीमुळे खालची फरशी टाईल्स तापणार असल्याने नवी समस्या निर्माण हाेईल. त्यातून नुकसान सहन करावे लागेल.

- निर्मला अरमरकर, गृहिणी, नरखेड.

...

सिलिंडरचे दर

डिसेंबर - ६५४.५० रुपये

जानेवारी - ७५४.५० रुपये

फेब्रुवारी - ८५४.५० रुपये

मार्च - ८७९.५० रुपये

एप्रिल - ८६९.५० रुपये

मे - ८६९.५० रुपये

जून - ८६९.५० रुपये

जुलै - ८६९.५० रुपये

ऑगस्ट - ८९५ रुपये

सप्टेंबर- ९४५ रुपये