नागपूर : अमरावती येथील जिल्हा सामान्य स्त्री रुग्णालयातील नवजात शिशू अतिदक्षता विभागात २२ एप्रिल २०१९ रोजी अचानक शॉर्ट सर्किटमुळे आग लागली. परंतु त्यावेळी कर्तव्यावर असलेले डॉक्टर, परिचारिका व कर्मचारी हे जागे असल्याने २२ बालकांचे प्राण वाचविण्यास त्यांना यश आले. अशीच घटना ३१ ऑगस्ट २०१९ रोजी इंदिरा गांधी शासकीय वैद्यकीय महाविद्यालय व रुग्णालयात (मेयो) घडली. ‘प्री टर्म बेबी युनिट’ला (पीबीयू) लागलेल्या आगीत एका परिचारिकेच्या धाडसाने नऊ बालकांचे प्राण वाचले. दोन वर्षांपूर्वी घडलेल्या या दोन्ही घटनेचा शासनासह भंडारा जिल्हा सामान्य रुग्णालयानेही धडा घेतला नसल्याचे दिसून येते.
मेयोचा त्या घटनेत ‘पीबीयू’कक्षात तिघे बालके ऑक्सिजनवर, दोघे ‘वॉर्मर’वर तर चार बालके इनक्युबेटरवर होती. रात्री सर्वच गाढ झोपेत असताना पहाटे २.४५ वाजता स्टाफ नर्स सविता ईखार आपल्या कामात व्यस्त होत्या. त्याचवेळी अचानक शॉर्ट सर्किट होऊन आग आगली. ईखार यांच्या लक्षात ही बाब येतात त्यांनी याची माहिती सुरक्षा रक्षकांना दिली. परंतु त्यांना यायला व मदत पोहचण्यास उशीर होणार असल्याने जीवाची बाजी लावत दोन हातात दोन बालके घेत सर्वांना सुरक्षितस्थळी हलविले. त्यापूर्वी आग पसरू नये म्हणून तातडीने ऑक्सिजन आणि वॉर्मरही बंद केले. या धाडसाने नऊ बालकांचे प्राण वाचले. विशेष म्हणजे, अशीच घटना १९९८ मध्ये घडली होती. बालरोग विभागाच्या अतिदक्षता विभागाला ‘शॉर्ट सर्किट’मुळे आग लागली होती. त्यावेळी विद्या चंद्रशेखर कावळे या परिचारिकेने कक्षातील सात बालकांना आपल्या पदरात घेऊन सुरक्षितस्थळ गाठले होते.
- नवजात शिशू अतिदक्षता विभागाला लागली होती आग
अमरावती येथील जिल्हा सामान्य स्त्री रुग्णालयातील नवजात शिशू अतिदक्षता विभागात ‘इन बॉर्न’ व ‘आऊट बॉर्न’ कक्षात २२ बालके उपचाराला होती. सकाळी १०.३० वाजताचा सुमारास या कक्षाच्या शेजारी असलेल्या विद्युत नियंत्रण कक्षातून अचानक स्फोट झाला. धूराचे लोट बाहेर येऊ लागले. यावेळी विभागातील इन बॉर्न युनिटमध्ये ९ मुले, २ मुली व आऊट बॉर्न युनिटमध्ये ७ मुले व १ मुली असे एकूण २२ शिशू होते. स्फोट, धूराचे लोट व उग्र गंध यामुळे अतिदक्षता विभागात एकच खळबळ उडाली. विभागात सर्वत्र काळोख पसरला होता. अंधारात काहीच दिसत नसतानादेखील डॉक्टर व कर्मचाऱ्यांनी शर्थीचे प्रयत्न केले. यावेळी वर्षा पागोटे, ललिता अटाळकर, नलिनी काळसर्पे यांच्यासह सहा नर्सेस व पाच महिला अटेंडंट यांनी तातडीने बालकांना दुसऱ्या कक्षात हलवून बालकांचे प्राण वाचविले.
- मेडिकलमध्ये नवजात बाळ जळाले होते
नागपूरच्या शासकीय वैद्यकीय महाविद्यालय व रुग्णालयाच्या (मेडिकल) ‘एनआयसीयू’ कक्षात ‘वॉर्मर’मध्ये ठेवलेल्या २७ दिवसाच्या बाळाचा जळून मृत्यू झाला होता. २००९ मध्ये या प्रकरणाचीही चौकशीही झाली. परंतु गंभीरता कुणीच घेतली नाही.
- चिमुकले जळण्याच्या घटनेतून खासगी हॉस्पिटलेही सुटली नाहीत
‘एनआयसीयू’मध्ये चिमुकले जळण्याच्या घटनेत खासगी रुग्णालये सुटली नाहीत. ८ जुलै २०१९ रोजी नागपूर येथील डॉ. कुश झुनझुनवाला यांच्या खासगी हॉस्पिटलमधील ‘एनआयसीयू’मध्ये भरती असलेला ११ दिवसाच्या बाळाचा ‘फोटो थेरपी’ यंत्रात जळून मृत्यू झाला होता.