चिमुकल्यांनी दाखविल्या अभिव्यक्तीच्या विविध तऱ्हा

- बहुजन रंगभूमीचा बालनाट्य महोत्सव : तीन बाल एकांकिकांचे सादरीकरण

लोकमत न्यूज नेटवर्क

नागपूर : बहुजन रंगभूमीने ३० वर्षे पूर्ण केले. त्या निमित्ताने आयोजित बालनाट्य महोत्सव रविवारी लक्ष्मीनगरातील सायंटिफिक सभागृहात रसिकांच्या प्रतिसादात पार पडला. या नाट्यमहोत्सवात चिमुकल्या रंगकर्मींनी आपल्या नाट्याभिव्यक्तीच्या विविध तऱ्हा सादर करत रसिकांना भावविभोर केले.

बहुजन रंगभूमीच्या वतीने द्विदिवसीय नाट्यमहोत्सवाचे आयोजन केले होते. पहिल्या व दुसऱ्या दिवशी नाट्य चळवळविषयक प्रबोधनात्मक मार्गदर्शन व नाट्यशिबिर ऊरुवेला कॉलनी येथील डॉ.बाबासाहेब आंबेडकर सांस्कृतिक भवनात पार पडले. त्यानंतर, रविवारी संध्याकाळी सायंटिफिक सभागृहात तिन बाल एकांकिकांचे सादरीकरण झाले. या तीनही एकांकिका बहुजन रंगभूमीचे विरेंद्र गणवीर यांनी लिहिल्या आहेत. बहुजन रंगभूमीच्या वतीने सादर झालेल्या सुरेंद्र वानखेडे दिग्दर्शित ‘थेंब थेंब श्वास’ या नाटकात देव नन्नावेर, अनया शिंपी, ईश्वरी गोडबोले, दीपांशी मुरमाडे, कौशिक गणेशे या बालकांच्या भूमिका होत्या, तर अस्मिता पाटील यांचे सह दिग्दर्शन होते. नेपथ्य उत्कर्ष तायडे, प्रकाशयोजना रिशिल ढोबळे, पार्श्वसंगीत रोहित लोखंडे, रंगभूषा निखिल कोसेकर, वेशभूषा हिमांशू वहाणे यांची होती. रंगमंच व्यवस्था ॲलेन नाखले व श्रेयस शेंद्रे यांची होती. दी बुद्धिस्ट ऑर्ट थिएटर ऑफ इंडियाच्या वतीने सादर झालेल्या रिशिल ढोबळे दिग्दर्शित ‘घायाळ पाखरा’मध्ये ओम राऊत, अनुष्का शेंडे, श्लोक पारवे, जिशांत मुरमाडे या बालकांच्या भूमिका होत्या. नेपथ्य शिवम मस्के, प्रकाशयोजना रितिक भगत, रंगभूषा यतिश वैद्य व वेशभूषा समुद्र रायपुरे यांची होती. निखिल दांडेकर, अमिता शंभरकर व स्तवन गवारे यांनी रंगमंच व्यवस्था सांभाळली. अश्वघोष कला अकादमीच्या वतीने सादर झालेल्या आशिष दुर्गे दिग्दर्शित ‘आम्हालाही पंख हवेत’मध्ये कौशिक गणेशे, पुण्या लारोकर, उन्नती गव्हाणे, पार्थ पवार, मुजफ्फर अहमद या बालकांच्या भूमिका होत्या. नेपथ्य अभिनय जपुलकर, प्रकाशयोजना किशोर बत्तासे, पार्श्वसंगीत रोहित लोखंडे, रंगभूषा डिंपल पाटील, वेशभूषा श्रद्धेय तारेकर यांची होती. भूषण मेश्राम व लक्की भरतवाडे यांनी रंगमंच व्यवस्था सांभाळली.

............