लसीकरणाचे अडथळे दूर सारत १४१० ज्येष्ठांनी घेतली लस

नागपूर : कोरोना प्रतिबंधक लसीकरणाच्या तिसऱ्या टप्प्यातील गैरसोयींचे अडथळे दूर सारत मंगळवारी १४१० ज्येष्ठांनी लस घेतली. यात शहरातील ९५७, तर ग्रामीणमधील ४५३ ज्येष्ठांचा समावेश आहे. ४५ वर्षांवरील गंभीर आजाराच्या लाभार्थ्यांनीही मंगळवारी लसीकरणासाठी गर्दी केली होती; परंतु ‘को-विन’ वेबसाईटमधील तांत्रिक बिघाडामुळे १२३ लाभार्थीच लस घेऊ शकले.

६० वर्षांवरील ज्येष्ठांच्या लसीकरणाच्या दुसऱ्या दिवशीही प्रशासन सोयींना घेऊन गंभीर नसल्याचे चित्र होते. धक्कादायक म्हणजे, लसीकरणनंतर डॉक्टरांच्या देखरेखीखाली लाभार्थ्यांना अर्धा तास बसविण्याच्या प्रकारालाही काही केंद्राने हरताळ फसल्याचे दिसून आले; परंतु अशा सर्व अडथळ्यांवर मात करीत सोमवारच्या तुलनेत मंगळवारी दुपटीने ज्येष्ठांनी लस घेतली. शहरातील ११ केंद्रांपैकी सर्वाधिक लसीकरण मनपाच्या इंदिरा गांधी रुग्णालयाच्या केंद्रावर झाले. २९३ लाभार्थ्यांनी लस घेतली. गंभीर आजाराच्या १४ लाभार्थ्यांनीसुद्धा याच केंद्रावर लस घेतली. या शिवाय, मेयो रुग्णालयाच्या ‘अ’ केंद्रावर १२२, ‘ब’ केंद्रावर ५९, एम्सच्या केंद्रावर १५६, डागा रुग्णालयाच्या केंद्रावर ४४, आयसोलेशन हॉस्पिटलच्या केंद्रावर २९, पाचपावली महिला हॉस्पिटलच्या ‘अ’ केंद्रावर २८, तर ‘ब’ केंद्रावर ३२, कामगार रुग्णालयाच्या केंद्रावर ४५, मेडिकलच्या ‘ए’ केंद्रावर ८४, ‘बी’ केंद्रावर ११८ लाभार्थ्यांनी लस घेतली. त्या तुलनेत लस घेतलेल्या गंभीर आजाराच्या लाभार्थ्यांची संख्या कमी राहिली. मेयोमध्ये २०, एम्समध्ये १०, डागामध्ये २, आयसोलेशनमध्ये ३, मेडिकलमध्ये १७ लाभार्थ्यांनी लस घेतली.

-खासगीला प्रतिसाद कमी

शहरातील तीन खासगी केंद्रांवर मंगळवारपासून लसीकरणाला सुरुवात झाली; परंतु शासकीय तुलनेत येथे कमी प्रतिसाद मिळला. मोगरे हॉस्पिटल केंद्रावर २२, लता मंगेशकर हॉस्पिटल केंद्रावर १४ तर, राष्ट्रसंत तुकडोजी महाराज कॅन्सर हॉस्पिटल केंद्रावर २९ ज्येष्ठांनी लस घेतली.

-ग्रामीणमध्ये ४५३ ज्येष्ठांचे लसीकरण

नागपूर ग्रामीणच्या १२ केंद्रांवर ६० वर्षांपेक्षा जास्त वय असलेल्या ४५३ आणि ४५ वर्षांपेक्षा जास्त वय असलेले व गंभीर आजार असलेल्या ५९ लाभार्थ्यांनी लस घेतली. काटोल ग्रामीण रुग्णालयात सर्वाधिक ११८ ज्येष्ठांचे लसीकरण झाले. उमरेड ग्रामीण रुग्णालयात ३८, पारशिवनी ग्रामीण रुग्णालयात १, सावनेर उपजिल्हा रुग्णालयात ६८, भिवापूर ग्रामीण रुग्णालयात १४, रामटेक उपजिल्हा रुग्णालयात ५०, कामठी उपजिल्हा रुग्णालयात ३५, कळमेश्वर ग्रामीण रुग्णालयात २९, हिंगणा ग्रामीण रुग्णालयात ६२, मौदा ग्रामीण रुग्णालयात ४, तर नरखेड ग्रामीण रुग्णालयात ३४ लाभार्थ्यांनी लस घेतली. पारशिवनी, मौदा आणि कुही ग्रामीण रुग्णालय वगळता उर्वरित सर्व केंद्रांवर गंभीर आजाराच्या रुग्णांना लस देण्यात आली.

-आजपासून प्रत्येकी केंद्रावर १०० लाभार्थ्यांनाच टोकन

ज्येष्ठांची गर्दी कमी करण्यासाठी प्रत्येक शासकीय केंद्रावर १०० लाभार्थ्यांनाच लस देण्याचा निर्णय महानगरपालिकेने घेतला. यामुळे बुधवारपासून १०० टोकन दिले जाईल. यामुळे केंद्रावर आता टोकन घेण्यासाठी गर्दी होईल. महापौर दयाशंकर तिवारी व मनपा आयुक्त राधाकृष्णन बी. यांनी केंद्रावर गर्दी न करण्याचे आवाहन केले आहे.

-आणखी दोन खासगी केंद्रांची पडणार भर

सीताबर्डी येथील लता मंगेशकर रुग्णालय, सक्करदरा येथील मोघरे चाईल्ड हॉस्पिटल, राष्ट्रसंत तुकडोजी महाराज कॅन्सर हॉस्पिटलमध्ये मंगळवारपासून लसीकरणाची सुरुवात झाली. बुधवारपासून आणखी दोन केंद्रांवर लसीकरण सुरू होणार आहे. यात सक्करदरा येथील गिल्लूरकर मल्टीस्पेशालिटी हॉस्पिटल तसेच रवीनगर येथे सेनगुप्ता रुग्णालयाचा समावेश आहे. येथे प्रति डोस २५० रुपये शुल्क भरून लस दिली जाणार आहे.